Policia nuk ia kompenson orët jashtë orarit zyrtarëve policorë, Gërxhaliu: Po e dobësojmë shtetin duke shkatërruar strukturat e tij nga brenda

Policia e Kosovës nuk ia ka kompensuar orët jashtë orarit të punëve zyrtarëve policorë. Për këtë ka reaguar njohësi i ekonomisë, Safet Gërxhaliu i cili ka shtruar pyetjen se “kush po luan me dinjitetin e Policisë, FSK-së e Zjarrfikësve”, shkruan lajmi.net. Ai ka thënë se vendimet e fundit, si ndalimi i kompensimit për punën jashtë…

Lajme

31/03/2025 16:15

Policia e Kosovës nuk ia ka kompensuar orët jashtë orarit të punëve zyrtarëve policorë.

Për këtë ka reaguar njohësi i ekonomisë, Safet Gërxhaliu i cili ka shtruar pyetjen se “kush po luan me dinjitetin e Policisë, FSK-së e Zjarrfikësve”, shkruan lajmi.net.

Ai ka thënë se vendimet e fundit, si ndalimi i kompensimit për punën jashtë orarit për zyrtarët policorë, janë dëshmi e një qasjeje të papërgjegjshme dhe shkelje e të drejtave të këtyre profesionistëve.

Sipas Gërxhaliut, kjo ndalesë e kompensimit të tyre bie ndesh me Ligjin për Policinë e Kosovës, i cili parashikon kompensime për detyra të rrezikshme, punë nën stres, jashtë orarit, gjatë festave dhe për caktime në punë të veçanta.

“Këto masa kanë shkaktuar pakënaqësi të thella dhe paralajmërime për greva në shumë sektorë. Në një kohë kur vendet e tjera po investojnë në motivimin e kuadrove të sigurisë, Kosova po i demotivon ata, duke dekurajuar pjesëmarrjen në trajnime dhe angazhimet shtesë. Kjo qasje e papërgjegjshme rrezikon të krijojë kaos dhe trazira, duke na rikthyer në situata të ngjashme me ato të marsit 2004, duke e kthyer vendin pas në progresin e arritur”, ka shkruar Gërxhaliu në Facebook.

Ai ka shkruar edhe për kontratat e lobimit në Washington, për të cilat thotë se nuk është asnjë.

“Është koha që institucionet e Kosovës të marrin përgjegjësinë dhe të ndalojnë këtë qasje destruktive ndaj forcave të sigurisë dhe interesave kombëtare. Nëse kjo neglizhencë vazhdon, pasojat do të jenë të rënda jo vetëm për zyrtarët e prekur, por për të gjithë qytetarët dhe të ardhmen e vendit Prandaj, natyrshëm shtrohet pyetja: A jemi duke përmbushur agjendën e atyre që nuk ia duan të mirën Kosovës? Ironikisht, edhe ata vetë nuk do ta kishin dëmtuar vendin në këtë mënyrë. Po krijojmë një realitet ku profesionistët e aftë dhe të përkushtuar po demotivohen, duke u detyruar të largohen nga institucionet dhe, në shumë raste, edhe nga vetë vendi. Në vend që të ndërtojmë një shtet funksional dhe të mbështesim ata që mund ta çojnë përpara, po e dobësojmë shtetin duke shkatërruar strukturat e tij nga brenda”, ka shkruar Gërxhaliu. 
Ai ka thënë se po e largojmë veten nga aleati ynë më i madh dhe më besnik, SHBA-të.
“Në një botë ku fuqia dhe mbështetja ndërkombëtare janë jetike për ekzistencën dhe zhvillimin tonë, ne po zgjedhim të izolohemi dhe të përçajmë marrëdhëniet me mikun tonë më të fuqishëm.
Kosovë, Zoti të ndihmoftë, sepse ata që duhet të të mbrojnë dhe të të zhvillojnë, po të shkatërrojnë çdo ditë”, ka shtuar ai.

Artikuj të ngjashëm

April 2, 2025

Vritet një polic në Kaçanik

Lajme të fundit

Vritet një polic në Kaçanik

27-vjeçarja që u godit nga vetura në Pejë...

Haziri thotë se nuk ka skemë kriminale për manipulim votash

Kurti shtron darkë për sekretarin e Jashtëm britanik