Një përleshje fizike mes disa personave ka ndodhur para rreth një ore në qendër të Prishtinës, pas një mosmarrëveshjeje në trafik.

Dyshohet se gjithçka nisi kur një veturë frenoi dhe u ndal papritur, ndërsa vetura që po vinte pas saj mezi arriti ta shmangte përplasjen.

Situata kaloi shpejt nga fjalosja në përleshje fizike, ku u përdorën grushtat dhe pati edhe persona të gjakosur.

Avokati, Arianit Koci, ka treguar se arriti të ndërhynte për ta qetësuar situatën, ndërsa policia mbërriti shumë shpejt në vendin e ngjarjes.

Ai ka shprehur shqetësimin për nivelin e dhunës në shoqëri, duke theksuar se problemet ekonomike e sociale dhe tensionet e krijuara në vend po ndikojnë edhe në sjelljen e qytetarëve.

Në reagimin e tij, ai ka kritikuar edhe gjuhën dhe sjelljen e përfaqësuesve politikë, duke vënë në pikëpyetje angazhimin e tyre për zgjidhjen e problemeve konkrete të qytetarëve dhe uljen e tensioneve në shoqëri.

Në fund, ai ka bërë thirrje që qytetarët të mos rrezikojnë veten duke ndërhyrë në përleshje të tilla, por të njoftojnë menjëherë Policinë. /Lajmi.net/