Interi e ka fituar ndeshjen e parë gjysmëfinale kundër Milanit në Ligën e Kampionëve, shkruan lajmi.net.

“Nerazzurrët” triumfuan me rezultat të pastër 0:2 kundër “Rossonerëve” në stadiumin “San Siro”.

Edin Dzeko është vlerësuar me notën më të lartë në këtë takim nga uebfaqja prestigjioze e vlerësimeve “Whoscored.com”.

Sulmuesi boshnjak ka marrë notën 8.1, ndërkohë që me notë të madhe u vlerësua edhe Mkitaryan 8.0.

Futbollistët me notën më të ulët te Milani ishin mbrojtësi Kjaer dhe mesfushori Kruniq 5.9.

Shifrat u zhbllokuan tek pas tetë minutave lojë kur sulmuesi boshnjak, Edin Dzeko iu përgjigji pozitivisht harkimit të Çalhanoglut nga këndi për të shënuar një gol të bukur.

Vetëm tre minuta më vonë, kuqezinjtë u shokuan sërish kur mesfushori Mkhitaryan dyfishoi avantazhin e Interit nga afërsia.

Momentet e mira për Interin vazhduan edhe pas katër minutave lojë, kur Hakan Çalhanoglu me një goditje të fuqishme nga distanca e goditi shtyllën.

Interi e mbylli pjesën e parë të ndeshjes me dominim thuajse në të gjitha aspektet kundër Milanit.

Në pjesën e dytë, Milani tentoi në disa raste që të paktën ta ngushtonte avantazhin. Vlen të përmendet goditja e Tonalit që u përplas në shtyllë.

Ndeshja e dytë ndërmjet dy rivalëve të përbetuar lokal luhet javën e ardhshme, gjithashtu në stadiumin “San Siro”.

Ekipi që shkon në finale do të përballet me fituesin e ndeshjes tjetër Manchester City – Real Madrid./Lajmi.net/