Një person është vrarë dhe dy oficerë policie janë plagosur rëndë në një sulm me thikë në Francën lindore.

Një burrë sulmoi njerëzit në Mulhouse, pranë kufirit gjerman, rreth orës 16:00 të së shtunës, raporton Sky News.

Prokurorët thanë se një 37-vjeçar algjerian ishte arrestuar dhe personi që vdiq ishte një civil që u përpoq të ndërhynte.

“Tmerri sapo ka pushtuar qytetin tonë”, tha kryebashkiaku Michele Lutz në Facebook.

Burri bërtiti “Allahu Akbar” (“Zoti është më i madhi”) ndërsa sulmoi oficerët e policisë, shtuan prokurorët.

Presidenti Macron i tha BFMTV se ishte “përtej dyshimit” se ishte një “akt terrorist islamik”. Ai tha se ministri i brendshëm po shkonte në Mulhouse dhe do të fliste më vonë.

Sulmuesi thuhet se ka qenë në një stacion policie – ku ai duhej të firmoste një dokument për ndalimin e tij – por refuzoi dhe vrapoi në tregun ku nisi sulmin.

Një polic u godit me thikë në qafë dhe një tjetër në gjoks, sipas mediave franceze. Tre policë të tjerë kanë pësuar lëndime shumë të lehta.

Sulmuesi me thikë thuhet se ishte nën arrest shtëpiak dhe ishte në një listë vëzhgimi të terrorizmit.

Sulmi francez vjen një ditë pas goditjes me thikë nga një refugjat sirian 19-vjeçar në memorialin e Holokaustit në Berlin .

Një turist spanjoll u plagos rëndë, por pritet të mbijetojë.

Sulmuesi thuhet se donte të vriste hebrenjtë pasi ishte i motivuar nga konflikti në Lindjen e Mesme, sipas prokurorëve.