Edhe pse parashihej që Kryesia e Kuvendit të Kosovës të mblidhet sot për të diskutuar hapat e mëtejshëm për funksionimin e institucionit ligjvënës, askush përpos Vetëvendosjes e komunitetit jo-serb nuk morën pjesë.

Në mbledhjen e thirrur nga kryetari i sapozgjedhur i Kuvendit, Dimal Basha nuk shkoi as nënkryetarja tanimë e zgjedhur e PDK-së, Vlora Çitaku dhe as nënkryetari i LDK-së, Kujtim Shala.

Në këtë mbledhje të pranishëm janë vetëm Dimal Basha, nënkryetarja e VV-së, Albulena Haxhiu si dhe nënkryetarja e komuniteteve jo-serbe, Emilja Rexhepi.

Mbledhja u thirr të shtunën nga kryetari Dimal Basha, i cili e shpalli të përfunduar seancën konstituive, megjithëse nuk ishte zgjedhur nënkryetari nga radhët e komunitetit serb.

Nënkryetarët e Kuvendit, Çitaku dhe Shala as nuk janë ulur asnjëherë në ulëset e nënkryetarëve pasi siç dihet Kuvendi vazhdon të jetë i pakonstituar dhe ka ngecur tek çështja e zgjedhjes së nënkryetarit nga radhët e serbëve./Lajmi.net/