Në mbledhjen e sotme të Asamblesë komunale të Pejës, pas akuzave të ashpra që i ka dhënë opozita e cila i është referuar raportit të fundit të auditorit të jashtëm, Muhaxheri mes tjerash, ka dhënë këtë përgjigje:

“Raporti i auditorit ka qenë tendencioz. Mund t’u them se unë kam qenë kryetari më i mirë në Kosovë për vitin 2014 sa i përket investimeve kapitale”, tha Muhaxheri.

Raporti i auditorit dhe deklarata e tillë e Muhaxherit pos që ka tensionuar opozitën, ka bërë që të reagojë edhe partneri i koalicionit, PDK.

Muhamet Halitaj nga PDK ka kërkuar që raporte të tilla si ky i auditorit të përgjithshëm, të merren seriozisht nga ana e ekzekutivit dhe e kryetarit.

Ndërsa Naim Sahiti nga AAK e ka përgëzuar Muhaxherin për vullnetin e tij që të qëndrojë si kryetar deri më 2054 dhe për epitetin dhënë vetës se është kryetari më i mirë në Kosovë.

“Ju përgëzoj për vlerësimet që i bëni vetes, por ju ftoj që të jepni dorëheqje, po hyjmë në zgjedhje dhe do e shikoni se ku do të mbeteni. Ju jeni qeverisje e ngelcanëve”, ka thënë Sahiti./KosovaPress/