Ministri i Zhvillimit Ekonomik, Fadil Ismajli do të marrë pjesë në takimin e 11’të të Këshillit Ministror të Komunitetit të Energjisë që këtë radhë mbahet në kryeqytetin e Serbisë – Beograd, ku do të marrin pjesë shtetet anëtare të Traktatit të Komunitetit të Energjisë si dhe përfaqësues të Komisionit Europian.

Në komunikatën e  lëshuar nga MZHE thuhet se kjo është hera e parë që një ministër i Zhvillimit Ekonomik i Republikës së Kosovës merr pjesë zyrtarisht në një takim të nivelit ministror në Beograd.

Në këtë takim janë paraparë të diskutohen çështjet me interes të veçantë si: Efiçienca e Energjisë, Termocentralet, implementimi i Traktatit të Energjisë me theks në implementimin e Pakos së Tretë të Bashkimit Evropian, Strategjia e Energjisë në nivel të rajonit, Projektet me interes të Komunitetit të Energjisë si dhe implementimi i mekanizmit për kompensim ndërmjet OST (ITC-Inter TSO Compensation), thuhet në një komunikatë të lëshuar nga Ministria e Zhvillimit Ekonomik.

Ne këtë takim Këshilli Ministror i Komunitetit të Energjisë pritet që të diskutojë edhe Raportin Vjetor të aktiviteteve të Komunitetit të Energjisë, buxhetin, programin e punës dhe çështjet tjera që lidhen me funksionimin e tij, thuhet në komunikatën e MZHE.