Ministri i Infrastrukturës, Liburn Aliu, ka vizituar dje nga afër punimet që po zhvillohen në dy urat e reja mbi lumin Ibër në Mitrovicë, të cilat aktualisht janë në fazë ndërtimi. Vizita e tij në terren u përqendrua në inspektimin e ecurisë së punimeve dhe dinamiken e zbatimit të projektit.

“Gjatë vizitave të djeshme në terren, pamë nga afër edhe punimet që po zhvillohen në urat mbi lumin Ibër në Mitrovicë.”, ka shkruar ai, transmeton lajmi.net

Ndërtimi i këtyre dy urave është pjesë e një projekti të financuar nga buxheti i shtetit, por tenderi për realizimin e tyre është duke u hetuar nga Prokuroria Speciale e Kosovës, mbi dyshimet për keqpërdorim të mundshëm të fondeve publike. Hetimet janë në fazë të hershme, ndërsa autoritetet nuk kanë dhënë ende detaje shtesë për natyrën e dyshimeve.

Ministri Aliu nuk ka komentuar publikisht lidhur me hetimet, por në deklaratat e mëhershme kishte theksuar rëndësinë e transparencës dhe llogaridhënies në projektet infrastrukturore.

Ndërkohë, çështja e urës kryesore mbi lumin Ibër – një simbol i ndarjes në Mitrovicë – mbetet ende e pazgjidhur. Në vitin 2024, ministri Aliu kishte deklaruar se “nuk ka asnjë arsye që kjo urë të mos hapet”, mirëpo Qeveria e Kosovës deri më tani nuk ka arritur ta hapë atë për qarkullim të lirë, pavarësisht premtimeve të mëhershme.

Qytetarët e Mitrovicës vazhdojnë të përballen me kufizime në lëvizje dhe ndarje të theksuara infrastrukturore, ndërsa ndërtimi i urave të reja shihet si përpjekje për të lehtësuar komunikimin mes dy pjesëve të qytetit – njëherësh duke ngritur edhe shqetësime për mënyrën e menaxhimit të fondeve publike në këtë proces./lajmi.net/