Ky memorandum synon formalizimin e kornizës së bashkëpunimit në mes të MAP- it, MASHT- it dhe Microsoftit, me ç’rast do të mundësohet qasje dhe pjesëmarrje më e madhe në programet, trajnimet, resurset dhe mjetet teknologjike të cilat janë pjesë e nismave globale të Microsoftit, YouthSpark dhe programi Partner në Mësim.

Ministri Bajrami ka theksuar se kjo marrëveshje ka një rëndësi të veçantë për sektorin e edukimit, sa i përket ndërtimit të një baze të mirë të bashkëpunimit me një nga kompanitë lidere të teknologjisë informative.

Bajrami ka shtuar se në kuadër të kësaj marrëveshje synohet realizimi i objektivave kosovare për përdorimin e teknologjisë dhe novacionit në edukim, që paraqesin prioritete të MASHT-it. Kjo marrëveshje ju mundëson gjeneratave te reja nxënësve, studentëve dhe personelit arsimor të përfitojnë nga platformat e Microsoftit pa krijuar ndonjë obligim financiar dhe juridik për Qeverinë e Republikës së Kosovës.

“Ky është një hap i mirë drejt modernizimit të sektorit të arsimit, drejt lansimit të produkteve që kjo kompani ka lansuar në rajon dhe në Evropë. Ne do të punojmë shumë afër me Ministrinë e Administratës Publike mbi bazën e këtij memorandumi, që shkollat tona të jenë sa më moderne, që nga mësimdhënia e deri te pajisja e shkollave me teknologjinë më të re të edukimit”, tha ministri Bajrami.

Memorandumi do të japë dimension të ri, më të thellë dhe më cilësor të bashkëpunimit me Microsoft. Në tre vjetët e ardhshme, në partneritet dhe bashkëpunim me Qeverinë, me universitetet, me organizatat joqeveritare dhe me një numër të madh të kompanive, do të krijohen shumë mundësi për të rinjtë në Kosovë, duke e nxitur zhvillimin e potencialeve te nxënësve, studentëve dhe mësimdhënësve.