Mbappe golashënuesi i tretë më i mirë francez në Ligën e Kampionëve, pas Benzemas e Henrys

10:47 | 25 Nentor 2021

PSG humbi ndeshjen ndaj Manchester City-t me rezultat 2-1 si mysafir, duke e humbur kështu edhe pozitën e parë të grupit.

Golin e vetëm për ‘parisienët’ e shënoi Kylian Mbappe i cili zhbllokoi sfidën në minutën e 50-të, përpara se vendasit të përmbysnin rezultatin më vonë me anë të Raheem Sterling e Gabriel Jesus.

Ndonëse goli i tij nuk kishte vlerë të madhe kolektive pasi skuadra nuk mori pikë, megjithatë Mbappe dita ditës po vazhdon të impresionojë me statistika të pabesueshme individuale, duke vendosur numra të frikshëm të golave.

Goli i mbrëmshëm ndaj Man City, ishte i 29-ti i Mbappes i realizuar në Ligën e Kampionëve, duke e barazuar legjendën franceze David Trezeguet, gjersa tani vetëm Karim Benzema (76) dhe Thierry Henry (51) kanë realizuar më shumë në kompeticion nga futbollistët francez.

Nga 29 golat e realizuara në Ligën e Kampionëve, 20 prej tyre kanë ardhur në transfertë, duke u bërë bërë lojtari i 11-të që shënon mbi 20 gola në terrenin mysafir në kompeticion, i cili e ka bërë vetëm në paraqitjen e 23-të dhe të cilit i’u kanë nevojitur më së paku ndeshje për ta arritur këtë nga 10 lojtarët e tjerë paraprak.

Francezi gjithashtu mbrëmë zhvilloi paraqitjen e tij të 50-të në Ligën e Kampionëve, duke u bërë lojtari i dytë më i ri (22 vjeç e 339 ditë) që e arrin këtë numër në kompeticion, pas Cesc Fabregas (22 vjeç dhe 331 ditë).

Në total, 22-vjeçari tani është i përfshirë në 47 gola në 50 paraqitje në Ligën e Kampionëve, me 29 gola të realizuara dhe 18 asistime.

/Lajmi.net/