Kuvendi i Kosovës ka miratuar mocionin për përfshirjen e Ligjit për Dhomat e Specializuara dhe Zyrën e Prokurorit të Specializuar në rendin e ditës së seancës së sotme.

Mocioni ka marrë mbështetjen e 79 deputetëve, ndërsa nuk ka pasur asnjë votë kundër dhe asnjë abstenim.

Pas miratimit të mocionit, Ligji për Specialen është përfshirë si pika e 11-të e rendit të ditës, ku pritet të shqyrtohet dhe të hidhet në votim nga deputetët.

Ky zhvillim vjen pas dakordimit të arritur ndërmjet PDK-së dhe Lëvizjes Vetëvendosje që ligji të procedohet në Kuvend në formën aktuale, pa ndryshime në këtë fazë.

Kujtojmë se ligji ishte miratuar më 6 tetor në Kuvend, por më pas ishte kthyer për rishqyrtim nga presidentja e vendit. Për miratimin e tij në këtë fazë dhe tejkalimin e vetos presidenciale nevojiten 61 vota. /Lajmi.net/