Kryetari Agim Ademi, priti sot në takim drejtorin e ri të kompanisë së sigurimeve Sigal Uniqa, Përparim Drini.

Takimi u zhvillua për të diskutuar rreth bashkëpunimit të dy institucioneve dhe për të vlerësuar punën e deritanishme.

Drejtori i Sigal Uniqa, Përparim Drini, në takim shprehu kënaqësinë e tij për punën e mirë të të dy institucioneve në vitet paraprake dhe ofroi gatishmërinë dhe përkushtimin maksimal të kompanisë së tij për të vazhduar si partner besnik i Federatës së Futbollit të Kosovës. Ai gjithashtu u shpreh se është i gatshëm të ndërmarrë hapa për të forcuar bashkëpunimin  dhe për të ndihmuar në zhvillimin e futbollit në Kosovë.

Nga ana tjetër, kreu i FFK-së e falënderoi drejtorin Drini për vizitën dhe për frymën pozitive të bashkëpunimit dhe i shprehu urime për detyrën e re. Ai gjithashtu shprehu bindjen se partneriteti midis FFK-së dhe Sigal Uniqa do të vazhdojë të rritet dhe të forcohet në të ardhmen.

Siç dihet, Sigal Uniqa është një nga partnerët shumëvjeçar të FFK-së dhe ka kontribuar në zhvillimin e futbollit në Kosovë në mënyra të ndryshme. Në bashkëpunim me këtë kompani, FFK ka realizuar projekte të suksesshme, siç është edhe sigurimi shëndetësor i futbollistëve dhe futbollisteve të Superligës, Ligës së Parë dhe Ligës së Dytë./Lajmi.net/