KQZ reagon për skandalin në New York: Shënimet nuk ishin në derën e konsullatës, por në derën e zyrës së një organizate tjetër, që poashtu, është në katin e njëjtë

Lajme

06/06/2026 19:32

Një skandal zgjedhor u raportua sot në konsullatën e Kosovës në New York, ku po votojnë diaspora kosovare atje.

Në një fotografi të siguruar nga mediumi Nacionale, shihet numri 116 i VV-së dhe numrat e disa prej kandidatëve për deputet. Po ashtu, raportohet se letrat kanë qëndruar të vendosura aty për mbi pesë orë, transmeton lajmi.net.

Në lidhje me këtë rast, zëdhënësi i KQZ-së, Valmir Elezi ka folur për lajmi.net. Në prononcimin e dhënë, Elezi tha se letra nuk ka qenë e vendosur në derën e konsullatës, por në derën e zyrës së një organizate tjetër, që poashtu, është në katin e 3-të.

“KQZ është në kontakt të vazhdueshëm me përfaqësitë diplomatike, ndërsa zyrtarët tanë po ofrojnë vazhdimisht udhëzimet e nevojshme për zhvillimin e procesit të votimit në përputhje me ligjin dhe procedurat në fuqi. Lidhur me rastin në fjalë, jemi njoftuar nga misioni diplomatik se letra me shënime nuk është vendosur në derën e Konsullatës së Kosovës në New York, por në derën e zyrës së një organizate tjetër, e cila gjithashtu ndodhet në katin e tretë të objektit ku është e vendosur konsullata. Pra, këto shënime nuk janë vendosur as para derës hyrëse të konsullatës. Fotografia e publikuar tregon se letra ndodhet në derën e një zyre tjetër, ndërsa në murin pranë saj është një shigjetë që tregon drejtimin e konsullatës në anën e kundërt.”, tha Elezi./lajmi.net/