Real Madridi dhe disa klube të tjera në Evropë dhe Amerikën e Jugut janë në favor të mbajtjes së Kupës së Botës për Klube çdo dy vjet për të rritur të ardhurat e tyre, por burime të shumta i thanë “ESPN-s” se FIFA e konsideron këtë si të pamundur.

Ende nuk është bërë asnjë kërkesë zyrtare, por burimet shtojnë se, gjatë edicionit të fundit të turneut në Shtetet e Bashkuara, zyrtarë nga disa klube kryesore diskutuan mundësinë me përfaqësuesit e FIFA-s.

FIFA ka thënë se është e kënaqur me rezultatin e formatit të ri, por aktualisht e konsideron të pamundur të mbajë një tjetër Kupë Bote për Klube pas dy vitesh dhe po planifikon të ardhmen për vitin 2029.

FIFA shpërndau 1 miliard dollarë midis ekipeve pjesëmarrëse në edicionin e fundit dhe, sipas burimeve, nuk do të ishte e qëndrueshme të gjenerohej kjo shumë çdo dy vjet.

Real Madridi, i cili arriti në gjysmëfinale, fitoi 82.5 milionë dollarë, ndërsa Chelsea, fituesi i turneut, gjeneroi të ardhura prej 114.6 milionë dollarësh.

Për më tepër, sipas të njëjtave burime, FIFA beson se mbajtja e turneut çdo dy vjet do të krijonte një konflikt me UEFA-n, gjë që nuk është në interesin e saj. Për më tepër, do të ishte logjistikisht e vështirë të futej në një kalendar futbolli tashmë shumë të ngjeshur.