Dy shtetas të Kosovës janë ekstraduar në Shtetet e Bashkuara të Amerikës, për tu gjykuar lidhur me një aktakuzë që autoritetet Amerikane kanë ngritur për ta.

Bëhet fjalë për dy të rinjë, Ardit Kutleshin 26 vjeçarin dhe Jetmir Kutleshin 28 vjeçar, të cilët ishin arrestuar me 22 dhjetor të vitit të kaluar në bazë të kërkesës, së SHBA’së, për ekstradim.

Ata akuzohen se mbikëqyrnin faqen e internetit ‘Rejdoks’ ku bëhej shitja e të dhënave personale të vjedhura për kryerjen e krimeve kibernetike dhe mashtrimeve duke dëmtuar financiarisht qytetarët amerikanë.

“Ne e vlerësojmë shumë bashkëpunimin e vazhdueshëm të autoriteteve kosovare për të ndihmuar qeverinë e SHBA-së në këtë rast, gjë që forcon përpjekjet tona të përbashkëta për të mbajtur të sigurt Kosovën dhe Shtetet e Bashkuara”, u tha në njoftimin e djeshëm të Ambasadës

Ndërsa, sipas një njoftimi të Departamentit Amerikan të Drejtësisë, në dhjetor të vitit të kaluar ishte ndaluar një faqe interneti dhe tregu i paligjshëm i dedikuar për shitjen e informacioneve të vjedhura personale, pajisjeve të aksesit dhe mjeteve të tjera për kryerjen e krimit kibernetik dhe mashtrimit.

Po ashtu, lidhur me rastin nga autoritetet në Kosovë, asokohe ishin arrestuar administratorët e kësaj faqeje, të quajtur Rydox, vëllezërit Ardit Kutleshi, 26 vjeç, dhe Jetmir Kutleshi, 28 vjeç.

Një administrator i tretë i kësaj faqeje, shtetasi kosovar Shpend Sokoli, ishte arrestuar në Shqipëri nga Organi i Posaçëm Kundër Korrupsionit (SPAK). Sokoli pritet të akuzohet dhe të ndiqet penalisht në Shqipëri./Insajderi