Prokuroria Themelore në Gjakovë, Departamenti i Përgjithshëm, njofton opinionin publik se ndaj të pandehurit me inicialet R.M., shtetas i Shqipërisë, ka marrë Aktvendim për fillimin e hetimeve si dhe ka paraqitur, kërkesë në Gjykatën Themelore në Gjakovë,  për caktimin e masës së paraburgimit në kohëzgjatje prej 30 ditësh.

Sipas kërkesës së Prokurorisë, ndër të tjera ceket se ekziston dyshimi i bazuar se i pandehuri R.M., nga data 06.07.2025, e gjerë me dt.15.07.2025, në rajonin e Gjakovës, duke përfshirë edhe fshatrat e Komunës së Gjakovës, në njëmbëdhjetë (11) raste të evidentuar deri më tani, duke depërtuar me forcë në hapësirat e mbyllur, pikërisht në shtëpitë e të dëmtuarve, me qëllim të përvetësimit të kundërligjshëm të dobisë pasurore për vete, merr pasurinë e personit tjetër, në nëntë (9) raste të dëmtuarve ju shkakton dëme materiale, ndërsa në dy (2) raste, veprimet e tij përkatësisht për përvetësim të pasurisë së luajtshme ka mbetur në tentativë.

Me këto veprime formohet dyshimi i bazuar se i pandehuri ka kryer veprat penale, Vjedhja e rëndë nga neni 315 par.1 nën par.1.1 të KPRK-së, Vjedhja e ngelur në tentativë nga neni 313 par.1 lidhur me nenin 28 të KPRK-së, dhe Vjedhja e rëndë e ngelur në tentativë nga neni 315 par.1 nën par.1.1 lidhur me nenin 28 të KPRK-së.

I pandehuri që nga data 16 korrik 2025, me vendim të Prokurorit të Shtetit gjendet nën masën e ndalimit 48 orësh për veprat penale të lartcekur.

Prokuroria Themelore në Gjakovë, vazhdon të mbetet e përkushtuar në luftën ndaj kriminalitetit, forcimin e sundimit të ligjit dhe vënien para drejtësisë të të gjithë atyre që bien ndesh me ligjin.