Kërkesa e Kosovës për marrjen e statusit special në KiE s’është në agjendën e këtij muaji

Lajme

02/04/2025 15:59

Kërkesa e Kuvendit të Kosovës për marrjen e statusit special në Këshillin e Evropës nuk do të jetë as në agjendën e mbledhjes së Komitetit për Çështje Politike dhe Demokraci të KiE-së të këtij muaji. Në mbledhjen në fillim të muajit të kaluar, ky Komitet kishte në plan të shqyrtonte kërkesën e Kosovës, por ndërhyri Serbia dhe u hoq nga rendi i ditës.

Më 7 prill do të mblidhet sërish Komiteti për Çështje Politike dhe Demokraci i Këshillit të Evropës në Strasburg. Për këtë takim ishin pritjet se Kosova do të hynte në agjendë pasi dështoi muajin e kaluar, megjithatë kjo s’do të ndodhë.

Një zëdhënës i Këshillit të Evropës në një përgjigje për Gazetën Express tha se kërkesa e Kosovës për marrjen e statusit special nuk do të shqyrtohet në këtë takim.

“Kolegët e Asamblesë Parlamentare të KiE-së konfirmuan se nuk ka asgjë në agjendën e Komitetit për Çështjet Politike për javën e ardhshme…”, tha shkurt ai.

Kërkesa e Kuvendit të Kosovës ishte në agjendën e takimit të Komitetit për Çështje Politike më 5 mars të këtij vitit. Por, pas një rishikimi të agjendës, kjo pikë ishte hequr nga rendi i ditës.

Për këtë ishte angazhuar Serbia.

Kryetarja e Kuvendit të Serbisë, Ana Bërnabiq, kishte falënderuar më pas miqtë nga Spanja dhe Partinë Popullore Evropiane për “mbështetje”.

“Mirënjohje e madhe për miqtë tanë nga Spanja, mirënjohje e madhe për miqtë tanë nga Partia Popullore Evropiane (EPP), të cilët na ofruan mbështetje në mënyrë që ta kishim shumicën për të arritur ta heqim këtë pikë nga rendi i ditës i komitetit politik të Asamblesë Parlamentare të Këshillit të Evropës”, tha Bërnabiq.

Këtë më pas e kishte konfirmuar edhe deputetja e Kosovës, Ariana Musliu-Shoshi, e cila ishte në atë mbledhje.

“Në fillim të takimit, me kërkesë të kryetarit të Grupit të EPP, Pablo Hispán, u votua për shtyrjen e kësaj pike nga rendi i ditës, një zhvillim i papritur që nuk ishte paraparë as në grupet politike dhe as si mundësi”.

Statusi i mysafirit special mund t’i jepet shteteve evropiane që s’janë anëtare të organizatës dhe kërkesa e shtetit për t’u bërë mysafir special i drejtohet Kryetarit të Asamblesë Parlamentare nga Kryetari i parlamentit përkatës, në këtë rast të Kosovës.

Serbia me këtë veprim shkeli Marrëveshjen e Ohrit të ndërmjetësuar nga Bashkimi Evropian, në të cilën Kosova dhe Serbia u dakorduan që të mos e pengojnë njëra-tjetrën në arenën ndërkombëtare.

Por, kjo s’kaloi pa u dënuar nga BE-ja.

“Sjellja e Serbisë në Këshillin e Evropës është një shkelje e qartë e detyrimeve të Serbisë nga Marrëveshja e Ohrit. Ky obligim përmendet në nenin 4 të Marrëveshjes, ku flitet për moskundërshtimin e anëtarësimit në organizatat ndërkombëtare”, kishte thënë një zëdhënës i BE-së.

Por, cila është procedura e pranimit dhe cili do të ishte roli i delegacionit të Kosovës në rast se pranohet?

Anëtarët e delegacioneve të mysafirëve speciale mund të ulen në Kuvendin e Asamblesë Parlamentare, por s’kanë të drejtë vote. Ata kanë të drejtë të flasin, por me autorizimin e Kryetarit të Asamblesë.

Po ashtu, ata mund t’i paraqesin kryetarit të komisionit propozime në lidhje me projekt-rendin e ditës të mbledhjeve të komisionit dhe propozime për amendamente në draft tekstet e shqyrtuara në këto mbledhje dhe ata mund të nënshkruajnë mocione për rezoluta dhe rekomandime dhe deklarata me shkrim.

Megjithatë, ato nuk do të merren parasysh për numrin e nënshkrimeve të kërkuara. Anëtarët e delegacioneve të ftuar të posaçëm mund të marrin pjesë në punën e grupeve politike sipas kushteve të vendosura nga grupet.

Konsultimi për kërkesën e Kosovës do të bëhet në përputhje me rregullën 62.3 të Rregullores së Asamblesë.

Më poshtë krejt çka përmban Rregulli 62 për mysafirë specialë:

62.1. Byroja mund t’u japë statusin e mysafirit special parlamenteve kombëtare të shteteve evropiane joanëtare që kanë aplikuar për anëtarësim në Këshillin e Evropës.

62.2. Çdo kërkesë zyrtare për statusin e të ftuarit special do t’i drejtohet Kryetarit të Asamblesë Parlamentare nga Kryetari i parlamentit përkatës.

62.3. Nëse Byroja, pasi është konsultuar me Komisionin për Çështjet Politike dhe Demokracinë, miraton një kërkesë të tillë, Kryetari i Asamblesë Parlamentare fton parlamentin përkatës të marrë statusin e mysafirit special.

62.4. Numri i anëtarëve të një delegacioni të ftuar special, i cili nuk duhet të kalojë tetëmbëdhjetë, do të jetë i njëjtë (pa zëvendësues) me numrin e vendeve që ka të ngjarë të jetë i përshtatshëm nëse shteti i ftuar special bëhet anëtar i plotë i Këshillit të Evropës. Ky numër caktohet nga Byroja, me propozimin e Komisionit për Çështje Politike dhe Demokraci.

62.5. Për aq sa e lejon madhësia e delegacionit të tij, një parlament me status të ftuar special do të emërojë anëtarë në mënyrë që të sigurojë një përfaqësim të drejtë të partive ose grupeve politike në atë parlament.

62.6. Kredencialet e anëtarëve të delegacioneve të ftuar special i dërgohen Kryetarit të Asamblesë Parlamentare, nëse është e mundur, jo më pak se një javë para hapjes së seancës. Këto letra kredenciale do t’i paraqiten Asamblesë Parlamentare për ratifikim në të njëjtën kohë me ato të përfaqësuesve dhe zëvendësve. Kredencialet e anëtarëve të delegacioneve të të ftuarve të posaçëm mund të kundërshtohen mbi bazat e deklaruara bazuar në paragrafin 1 më lart. Kredencialet e kontestuara do t’i referohen pa debat në mbledhjen e përbashkët të Komisionit për Çështje Politike dhe Demokraci dhe Komisionit për Rregulloren e Punës, Imunitetet dhe Çështjet Institucionale, të kryesuar nga kryetari i Komisionit për Rregulloren e Punës, Imunitetet dhe Çështjet Institucionale. Këto komitete do t’i raportojnë Byrosë sa më shpejt të jetë e mundur.

62.7. Anëtarët e delegacioneve e të ftuarve specialë mund të ulen në Kuvend por pa të drejtë vote. Ata kanë të drejtë të flasin me autorizimin e Kryetarit të Asamblesë.

62.8. Anëtarët e delegacioneve të ftuar të posaçëm mund të marrin pjesë në mbledhjet e komisionit siç parashikohet në Rregullën 48.5. Ata mund t’i paraqesin kryetarit të komisionit propozime në lidhje me projekt-rendin e ditës të mbledhjeve të komisionit dhe propozime për amendamente në draft tekstet e shqyrtuara në këto mbledhje. Kryetari i komisionit vendos për çdo veprim të mëtejshëm. Ata mund të nënshkruajnë mocione për rezoluta dhe rekomandime dhe deklarata me shkrim. Megjithatë, ato nuk do të merren parasysh për numrin e nënshkrimeve të kërkuara. Anëtarët e delegacioneve të ftuar të posaçëm mund të marrin pjesë në punën e grupeve politike sipas kushteve të vendosura nga grupet.

62.9. Komisioni për Çështje Politike dhe Demokraci, ose së paku 20 anëtarë, mund t’i kërkojnë Kryetarit pezullimin ose tërheqjen e statusit të mysafirit special. Kryetari do të informojë menjëherë Byronë për çdo kërkesë të tillë. Nëse kërkesa nuk është bërë nga Komisioni për Çështje Politike dhe Demokraci, Kryetari kërkon menjëherë mendimin e atij komisioni, i cili ia përcjell Byrosë.

62.10. Anëtarët e Byrosë do të informohen për shqyrtimin e një çështjeje të tillë të paktën dy javë përpara mbledhjes së Byrosë në të cilën do të zhvillohet. Vendimi i Byrosë merret me shumicë prej dy të tretave.

62.11. Kur statusi i mysafirit special është tërhequr, parlamenti në fjalë do të bëjë një kërkesë tjetër zyrtare nëse dëshiron ta marrë sërish këtë status. Pezullimi i statusit të të ftuarit special mund të hiqet nga Byroja duke vendosur me dy të tretat e shumicës nëse konsideron se kushtet që kanë çuar në pezullimin nuk ekzistojnë më.