Adnan Januzaj ka shkëlqyer me paraqitjet e tij të para në Premierligë sa që në fundjavë nënshkroi kontratë të re pesëvjeqare me Manchester Unitedin, deri më 2018.

Ylli kosovar është temë e nxehtë në futbollin evropian pasi i kanë mjaftuar vetëm dy-tri ndeshje për të shfaqur shenjat e një talenti të jashtëzakonshëm.

Me këtë, ai përveç se ka siguruar statusin e titullarit në dy ndeshjet e fundit në Premierligë kundër Sunderlandit dhe Southamptonit, Januzaj është inkuadruar në listën e ekipit për në Ligën e Kampionëve.

Januzaj është inkuadruar në skuadër si futbollist vendor (i zhvilluar në Angli). Dhe, 18-vjeçari u përkujdes që në seancën e fundit stërvitore para duelit kundër Real Sociedadit në kuadër të Grupit A në Ligën e Kampionëve të mërkurën, të shfaq shenja të shkëlqimit që bënë që asistenti Steve Round të deklaroj: “Ja pse ai mund të luajë për Anglinë”.

“Ai është në dispozicion. Është futbollist i talentuar i cili do të luajë rol të rëndësishëm në të ardhmen”, deklaroi menaxheri i Manchester United, David Moyes në konferencë për shtyp.