Inspektorati Policor i Kosovës (IPK) ka rekomanduar suspendimin nga detyra të tre zyrtarëve policorë të Stacionit Policor Klinë, nën dyshimin se këta zyrtarë nuk kanë raportuar veprimet dhe rrethanat që përbëjnë elemente të veprës penale “moslajmërim i veprave penale apo kryerësve të tyre”.

Veprimet fillestare hetimore ndaj këtyre policëve janë ndërmarrë nga Departamenti i Hetimeve në IPK, në bashkëpunim me Prokurorinë Themelore në Pejë.

Rekomandimi për suspendim është bërë me qëllim që hetimi të zhvillohet në mënyrë të pavarur dhe pa ndikim, teksa autoritetet synojnë sqarimin e plotë të çdo rrethane dhe veprimi që mund të jetë kundërligjor.

Incidenti për të cilin po hetohen zyrtarët dyshohet të ketë ndodhur më 19 shtator 2025 në Klinë, dhe sipas IPK-së, zyrtarët nuk e kanë kryer obligimin ligjor për raportim të veprimeve që cenojnë interesin publik dhe ligjin.

Hetimi është në vazhdim dhe gjithçka do të sqarohet në përputhje me procedurat ligjore dhe kompetencat përkatëse.