Interi e ka fituar ndeshjen e parë gjysmëfinale kundër Milanit në Ligën e Kampionëve.

“Nerazzurrët” triumfuan me rezultat të pastër 0:2 kundër “Rossonerëve” në stadiumin “San Siro”.

Trajneri i Interit, Simone Inzaghi u shpreh i kënaqur me fitoren në ndeshjen e parë, duke veçuar paraqitjen e futbollistëve të tij në pjesën e parë.

Inzaghi shtoi se ekipi i tij ka mundur të realizonte edhe gola të tjerë në këtë përballje.

“Jam shumë i kënaqur. Pjesa e parë ishte e jashtëzakonshme, në të vërtetë mund të kishim shënuar më shumë se dy gola”, tha Inzaghi për Amazon Prime Italia, transmeton lajmi.net.

“Ishte një lojë e mrekullueshme, ne kemi kaluar tashmë nëpër disa raunde, kështu që ne e dimë se është vetëm ndeshja e parë. Ne do t’i kemi tifozët tanë pas vetes në ndeshjen e dytë dhe e dimë se ka ende një shtysë tjetër për ta bërë realitet këtë ëndërr”.

“Djemtë mbuluan çdo cep të fushës, ata ndihmuan njëri-tjetrin dhe ne e dimë se puna nuk ka përfunduar ende”, tha Inzaghi.

Ndeshja e dytë ndërmjet dy rivalëve të përbetuar lokal luhet javën e ardhshme, gjithashtu në stadiumin “San Siro”.

Ekipi që shkon në finale do të përballet me fituesin e ndeshjes tjetër Manchester City – Real Madrid./Lajmi.net/