Igli Tare refuzoi të përgjigjej për pyetjet në lidhje me mundësinë që ai të emërohet drejtor sportiv i Milanit, por tha se Antonio Conte dhe Massimiliano Allegri janë trajnerët më të mirë italianë.

Ish-reprezentuesi shqiptar është një nga kandidatët kryesorë për të marrë rolin e drejtorit sportiv të Milanit për sezonin 2025-26, sidomos pas dështimit të negociatave me Fabio Paratici.

Ish-sulmuesi dhe drejtori sportiv i Lazios ishte i ftuar në Tring TV Albania të mërkurën, por ai nuk pranoi të komentojë mbi spekulimet për kalimin te Milani.

“Nuk mund të them asgjë. Ata kanë një skuadër të mirë dhe mund të luftojnë për titullin,” tha Tare.

Drejtori i ri sportiv i Milanit pritet të zgjedhë edhe trajnerin e ri për sezonin 2025-26, në vend të Sergio Conceiçao.

Conte dhe Allegri janë përmendur tashmë si kandidatë për pankinën e Milanit, dhe padyshim të dy do të përshtateshin me projektin e Tares.

“Allegri dhe Conte janë trajnerët më të mirë italianë,” tha ish-sulmuesi.

Tare ishte drejtori i parë që i dha një mundësi Simone Inzaghit në futbollin e ekipeve të para, kur në vitin 2016 tekniku italian u promovua nga Primavera në ekipin e parë të Lazios.

“Ai ishte i paracaktuar, këtë e kam thënë gjithmonë. Dhe ende ka hapësirë për t’u përmirësuar,” përfundoi Tare.

Milani aktualisht ndodhet në vendin e 9-të në tabelën e Serie A, jashtë zonës që siguron pjesëmarrje në Evropë.