Deputeti i Lidhjes Demokratike të Kosovës (LDK), Avdullah Hoti, ka reaguar ndaj situatës aktuale të ngërçit institucional pas seancës konstituive të Kuvendit, duke kritikuar ashpër Gjykatën Kushtetuese për, siç thotë ai, krijimin e krizës politike përmes vendimeve të saj të mëhershme.

Në një postim publik, Hoti tha se Gjykata Kushtetuese nuk duhet të zgjidhë çdo problem politik, por duhet të përqendrohet në zgjidhjen e atyre që vetë i ka shkaktuar përmes interpretimeve të saj, transmeton lajmi.net

Ai rikujtoi aktgjykimin e vitit 2014 – i cili është cituar edhe në vendimin e 26 qershorit 2025 – duke e cilësuar atë si themelin e një bllokade institucionale, pasi i jep partisë së parë të dalë nga zgjedhjet të drejtën absolute për të propozuar kandidatin për kryetar të Kuvendit, duke anashkaluar faktin se ajo mund të mos ketë shumicën e nevojshme për të udhëhequr institucionin.

“Ky aktgjykim e ka shkelur parimin e dominimit të shumicës, një parim themelor në demokracitë parlamentare, duke i mohuar të drejtën 80 deputetëve që mund të formojnë shumicën për të propozuar dhe zgjedhur kryetarin e Kuvendit,” tha Hoti.

Ai shtoi se vendimi i vitit 2014 ka prekur gjithashtu edhe një tjetër element thelbësor të funksionimit demokratik: mandatin e lirë dhe të pakushtëzuar të deputetit. Duke ia njohur ekskluzivisht të drejtën për propozim vetëm partisë së parë, deputetët nuk janë më të lirë të votojnë sipas bindjes, por janë të detyruar t’i binden një logjike procedurale që nuk përfaqëson shumicën reale në Kuvend.

“Deputeti, në këtë mënyrë, nuk është më i lirë në ushtrimin e mandatit të tij,” theksoi ai.

Hoti paraqiti edhe një propozim konkret për tejkalimin e kësaj krize: që fituesit relativ t’i njihet automatikisht e drejta për të propozuar kandidatin për kryetar të Kuvendit dhe më pas mandatarin për Qeverinë, por kjo e drejtë duhet të jetë e kufizuar në kohë.

Nëse brenda një afati të arsyeshëm kjo e drejtë nuk shfrytëzohet, atëherë ajo i kalon çdo subjekti tjetër që arrin të sigurojë shumicën parlamentare.

“Vetëm një zgjidhje e tillë është në frymën e Kushtetutës, në përputhje me parimet elementare të funksionimit të demokracive parlamentare dhe në linjë me praktikat e shteteve evropiane,” përfundoi Hoti.

Debatet rreth seancës konstituive dhe rolit të Gjykatës Kushtetuese janë intensifikuar pas zhvillimeve të fundit në Kuvend, kur u kontestua vendimi i kryesuesit për ndryshimin e rendit të ditës, si dhe pas interpretimit të ri të Gjykatës mbi të drejtën për propozimin e kryetarit të Kuvendit.

Postimi i plotë: