Pak minuta pas njoftimit se Bekë Berisha ka dhënë dorëheqjen nga pozita e kryetarit të KB Prishtinës, ish-ylli i klubit, Granit Rugova, ka konfirmuar kandidaturën e tij për të marrë drejtimin e skuadrës kryeqytetase të basketbollit.

Në një postim në Facebook, Rugova thekson se vendimi për kandidim nuk lidhet me ambicie personale, por me dëshirën për të përdorur përvojën, njohuritë dhe energjinë e tij në menaxhimin e klubit. Ai shprehet se synon të bashkojë PLISAT, qytetarët e Prishtinës dhe të gjithë tifozët e klubit për të rikthyer Prishtinën në rrugën e fitoreve dhe sukseseve, transmeton lajmi.net.

“Prishtina ka qenë pjesë e pandashme e jetës sime që nga paslufta. Ky klub më ka formuar si basketbollist, sportist dhe si njeri. Pas karrierës si lojtar, kam vazhduar të kontribuoj në udhëheqjen e sportit, si pjesë e Federatës së Basketbollit të Kosovës dhe më pas si Drejtor i Sportit në Komunën e Prishtinës. Kjo përvojë më ka dhënë një pamje të qartë se si duhet të udhëhiqet një klub i madh me vizion, stabilitet dhe transparencë,” shkruan Rugova.

Postimi i plotë: 

Sot, e ndiej obligim moral te marr pergjegjesi dhe ta shpreh haptas vullnetin tim per te pretenduar per poziten e kryetarit te klubit te zemres . Jo per ambicie personale, por sepse besoj se kam njohurite, pervojen dhe energjine per ta menaxhuar mire klubin dhe, bashke me PLISAT, qytetaret e PRISHTINES dhe te gjithe dashamiret e klubit, ta cojme klubin aty ku e meriton.

Kthimi ne rrugen fitoreve dhe kupave .

Bashke mundemi dhe do t’ja dalim ./lajmi.net/