Suela Muminovic, bashkëshortja e xhudistit kosovar, Akil Gjakova disa ditë më parë ka bërë kërkesë për urdhër mbrojtje nga ai.

Në kërkesën e saj thuhet se i dyshuari ka ushtruar dhunë fizike dhe psikike të vazhdueshme që nga korriku i 2023-tës e gjithashtu thuhet se viktima e gjakosur është parë edhe nga fëmija e tyre.

“Që nga dt.30 Korrik 2023, e në vazhdimësi, kryesi dhunës fillimisht ka fillu të përdorë dhunë të hatashme fizike, dhe psikike duke i shkaktu dem edhe të miturit, pasi që i mituri në atë gjendje të gjakosur e ka pa nënën e tij”, bëhet me dije në kërkesën që Insajderi ka siguruar.

Insajderi ka siguruar vendimin e Gjykatës në të cilin është aprovuar kërkesa e Muminovic.

“Lëshohet urdhër për mbrojtje emergjente, kundër palës përgjegjëse Akil Gjakova, afrimi i palës së mbrojtur, Suela Mominovic-Gjakova, në distancë 50 metra në shtëpinë ku është duke qëndruar tani pala e mbrojtur, në rrugë, qytet dhe vendin e punës. I NDALOHET në të ardhmen të ushtroj dhunë fizike dhe psikike, të bllokoj lëvizjes e viktimës, të ofendoj, shqetësoj dhe kërcënoj palën e mbrojtur”, thuhet në vendim.

Poashtu, Gjykata ka vendosur edhe për kujdestarinë e fëmijës së çiftit.

“Fëmija i mitur i besohet përkohësisht palës së mbrojtur, përkatësisht të ëmës së tij, në përkujdesje, rritje dhe edukim”, thuhet tutje.

Përveç kujdestarisë së fëmijës 3 vjeçar, Gjykata ka vendosur edhe për kohën, ditën dhe vendin kur Gjakova mund të takoj të birin.

“Caktohet kontakti i palës përgjegjëse, Akil Gjakova nga Peja, më fëmiun e mitur, dhe atë dy herë në muaj. Të premten e dytë dhe të premten e katërt. Kontakti i caktuar do të realizohet pran Qendrës për Punë Sociale në Pejë, në prezencën dhe mbikqyrjen e punëtorit social“, thuhet në vendim.