Gjenerali kryesor amerikan për Evropën, Christopher Cavoli, gjatë raportimit para senatit amerikan për forcat amerikane edhe për situatën e sigurisë nëpër vendet, ku ato janë të vendosura, ai ka përmendur edhe rajonin e Ballkanit Perëndimor, përkatësisht Kosovën dhe Bosnjë e Hercegovinën.

Për këto dy shtete, ai u shpreh se këtu vazhdon ende të ketë shqetësime të sigurisë dhe stabilitetit, madje ka përmendur edhe se SHBA-ja kontribuon me 600 ushtarë.

Gjenerali amerikan ka përmendur se Italia është shteti që ka dhënë më së shumti kontribut në KFOR, dhe se SHBA-ja ka dislokuar forca rezervë për t’u marrë me tensionet e rritura në vitin e fundit në Kosovë, derisa ka treguar se synojnë zgjerimin e numrit të përhershëm të forcave në Kosovë, për të liruar trupat rezervë.

Për këtë, ai shpreson në një marrëveshje sa më të shpejtë.

“KFOR-i mbetet në terren. Ai është një vend, ku Italianët dhe aleatët kujdesen vërtetë shumë. Kemi pasur forca rezervë që kemi dislokuar atje prej më shumë se një viti për t’u marrë me rritjen e tensioneve atje. Po zgjerojmë numrin e forcave të përhershme për të liruar forcat rezervë, dhe besoj që do të arrijmë në një marrëveshje për këtë shumë shpejtë”, ka thënë Cavoli, i pyetur nga senatorja amerikane, Jeanne Shaheen për të adresuar edhe çështjen e Kosovës dhe Bosnjës.

Sa i përket dislokimit të trupave rezervë në Kosovë, ai ka përmendur Turqinë, Hungarinë, Mbretërinë e Bashkuar dhe Italinë, duke i cilësuar si mjaft të përgjegjshme sa i përket forcave rezervë.