Drejtori për Siguri dhe Emergjenca në Prishtinë, Lulzim Fushtica ka thënë se sot në Prishtinë si pasojë e erërave të forta dhe stuhisë së madhe, është rrëzuar një kulm i një ndërtese në lagjen Pejton.

I ftuar në emisionin “Ditari” në Tëvë1, Fushtica tha se si pasojë e rënies së kulmit të asaj ndërtese, janë dëmtuar tri automjete, ku njerëz të lënduar nuk ka pasur.

“ Për fat të mirë stuhia nuk e ka goditur Prishtinën edhe pse ne kemi bërë paralajmërim sot në mëngjes që qytetarët të kenë kujdes të shtuar, i goditi disa qytete të tjera të Kosovës, ku ka pasur reshje të shiut dhe erëra të forta. Në Prishtinë ne sot kemi pasur një stuhi e shkurtë dhe një erë të fortë ku si pasojë ne kemi pasur tri intervenime në kryeqytet, intervenimi kryesor ka qenë në lagjen “Pejton” në një parking të ndërtesës publike. Si pasojë e rrëzimit të kulmit të ndërtesës që gjendet aty në afërsi janë dëmtuar tri automjete, për fat të mirë nuk kemi pasur lëndime të njerëzve”, ka deklaruar Fushtica.

Ai ka thënë se gjatë mbrëmjes është paralajmëruar të ketë reshje shiu, duke thënë se rreziku nuk ka kalaur.

“Rreziku ende nuk ka kaluar, pasi sipas njoftimit të Institutit Hidrometeorologjik gjatë mbrëmjes pritet të ketë reshje shiu”, ka thënë ai.

Fushtica tha se të gjitha ekipet janë në gjendje gatishmërie duke filluar nga Policia e Kosovës, shërbimi profesional i Zjarrfikësve dhe kompanitë e kontraktuara.

“I kemi pasur edhe dy raste të tjera në kryeqytet njërën e kemi pasur në Dardani dhe njërën në një lokal xhami i është thyer dhe për fat të mirë nuk kemi pasur njerëz të lënduar. Të gjitha ekipet janë në gjendje gatishmërie duke filluar nga Policia e Kosovës, nga shërbimi profesional i Zjarrfikësve, Ndërrmarjet Publike, Kompanitë e Kontraktuara. Ne jemi duke i përcjellë me kujdes zhvillimet e orëve në vijim për arsye se ende rreziku nuk ka kaluar sepse edhe në orët e mbrëmjes pritet që të ketë shi”, shtoi ai.

Ndryshe, ai tha se në kryeqytet është duke vazhduar inspektimi i ndërtesave, dhe mandej ai tha se do bëhen edhe inspektimi i banesave dhe lokaleve.

“Është duke vazhduar inspektimi së pari i ndërtesave që janë pronë e komunës dhe i gjendjes teknike dhe i rrezikshmërisë së tyre, dhe mandej edhe i banesave dhe lokaleve. Ne kemi filluar së paku që tre muaj. Nga java e kaluar ne kemi angazhuar të gjitha kompanitë që kanë pastruar disa puseta, në pjesën tjera të kryeqytetit punët janë duke vazhduar”, tha Fushtica