Filarmonia e Kosovës mban koncert me vepra të cilësuara si emblematike për muzikën shqiptare korale
Vepra të cilësuara emblematike të autorëve shqiptarë do të interpretohen sonte në koncertin e Filarmonisë së Kosovës.
ShowBiz
Një pjesë e programit që do të prezantohet sonte është prezantuar edhe në Londër, paraqitje e cila sipas drejtorit të Filarmonisë, Baki Jashari, i ka lënë përshtypje të mira publikut londinez, raporton Ekonomia Online.
“Ky koncert është përgatitur disa muaj dhe mund të themi që një pjesë e programit që do të prezantohet sot është prezantu edhe në Londër, ku ne në fillim të muajit të kaluar kemi realizuar një turne koncertal, ku kori i filarmonisë është prezantu në tri koncerte të ndara”.
Ndërsa dirigjenti Rafert Rudi tha se publiku që do ta përcjellë koncertin e Filarmonisë do të mund të dëgjojë një shtrirje historike të veprave.
“Programi i sotëm është sajuar në atë mënyrë që të ketë një prezantim të krijimtarisë së autorëve kosovarë me theks të posaçëm në veprat që ne i konsiderojmë emblematike për muzikën tonë korale por njëkohësisht kanë qenë vepra që i kemi prezantuar në Londër. Është një shtrirje historike e muzikës sonë korale që do ta prezantojmë”.
Filarmonia këtë koncert e realizon në bashkëpunim me Festivalin Remusica.
Sipas Rudit, ky festival por edhe jeta muzikore në Prishtinë viteve të fundit ka shënuar një ngritje të cilësisë.
“Ky bashkëpunim konsiston që filarmonia e realizon programin e tyre vjetor, unë do të kisha thanë që edhe Remusica, edhe festivalet e tjera kanë pasë një ngritje të përgjithshme sikundër edhe jeta muzikore e Prishtinës është në një rritje të hetueshme”.
Koncerti i cili do të mbahet në kishën Shën Ndou do të fillojë në ora 20:30.