FFK me vendim të papritur për lojtarët e huaj
Tifozët kosovarë duhet të presin edhe disa javë për të parë cilësitë e futbollistëve të huaj, të ardhur në afatin kalimtar të janarit.
Sport
Kështu, lojtarët e huaj të Trepçës ’89, Feronikelit, Trepçës dhe skuadrave tjera, nuk do të mund të aktivizohen as në javën e parë të stinorit pranveror të Vala Superligës, që nis të shtunën.
Zyrtari i FFK-së për regjistrimin e lojtarëve, Adem Qollakaj tregon arsyen përse ata nuk mund të paraqiten.
“Ende nuk kemi marrë lejen për këta lojtarë, nga federatat e tyre ku kanë luajtur së fundi. Prandaj, përderisa ata nuk kthejnë përgjigje, ne duhet të presim 30-ditëshin, sipas rregullave të FIFA-s, dhe më pas të njoftojmë FIFA-n. Tek atëherë kanë të drejtë loje”, sqaroi Qollakaj për Gazetën Olle.
Për të njëjtën arsye, dy përforcimet e Besës së Pejës, Yacine si Salem dhe Can Gokhan, u larguan nga skuadra pejane, duke mos dashur të humbin kohë. “Jemi rikthyer në Francë pasi duhej kohë për të pritur letrat nga Federata e Francës. Prandaj, menduam se është më mirë të kthehemi këtu”, tha Salem të mërkurën.
Asnjëri nga këta lojtarë nuk u paraqitet në ndeshjet e Kupës, e nuk pritet të paraqiten as në takimet e fundjavës. Gjasat janë që ata të luajnë në javën 19, kur të përmbushet afati prej 30 ditësh, që prej paraqitjes së tyre në FFK.