Zëdhënësi i Komisionit Qendror të Zgjedhjeve (KQZ), Valmir Elezi, ka bërë të ditur se gjatë ditës së sotme pritet të përfundojë procesi i numërimit të votave të kandidatëve për deputetë, si dhe verifikimi i rezultateve të subjekteve politike në komunën e Prishtinës.

Elezi ka deklaruar se, përveç përfundimit të numërimit të fletëvotimeve nga 30 përfaqësitë diplomatike, gjatë ditës së sotme pritet të mbyllen edhe aktivitetet e mbetura që lidhen me votat e vendvotimeve të rregullta.

“Përveç përfundimit të numërimit të fletëvotimeve që u takojnë 30 përfaqësive diplomatike, gjatë ditës së sotme, presim që të përfundojë procesi i numërimit të votave të kandidatëve për deputetë dhe verifikimi i rezultateve të subjekteve politike nga formularët e plotësuar në vendvotime të dielën në mbrëmje, edhe në komunën e Prishtinës”, ka thënë Elezi.

Sipas tij, përmbyllja e këtyre proceseve do të shënojë përfundimin e aktiviteteve në të gjitha qendrat komunale të numërimit në vend.

“Kësisoj, ky moment do të shënonte përfundimin e aktiviteteve në të gjitha komunat e Republikës së Kosovës, në 38 sosh, ku gjatë këtyre ditëve janë zhvilluar këto dy aktivitete kryesore që kanë të bëjnë me fletëvotimet nga vendvotimet e rregullta”, ka shtuar ai.

Përfundimi i këtyre procedurave pritet të mbyllë fazën e numërimit dhe verifikimit të votave të rregullta në nivel vendi, ndërsa në Qendrën e Numërimit dhe Rezultateve vazhdon procesimi i votave nga diaspora dhe votimi me postë. /Lajmi.net/