Lëvizja Vetëvendosje sot ka dorëzuar ankesë në Gjykatën Supreme ndaj vendimit të PZAP-së që urdhëroi KQZ-në të certifikojë Listën Serbe në zgjedhjet e 9 shkurtit 2025.

E për këtë, zëdhënësi i KQZ-së, Valmir Elezi ka thënë se Gjykata Supreme ka një afat kohor prej 5 ditësh për të marrë vendimin lidhur me ankesën që ka parashtruar VV-ja ndaj vendimit të PZAP-së për Listën Serbe.

“Si Komision Zgjedhor i Zgjedhjeve kemi bërë të qartë qëndrimin menjëherë pasi paneli zgjedhor për ankesa dhe parashtresa ka vendosur ndaj njoftimit Komisionit Zgjedhor të Zgjedhjeve i cili ka dalë nga mbledhja e datës 23 dhjetor, ajo çfarë mund të themi tani është natyrisht të përsërisim të njëjtin qëndrim se në vendimin e panelit zgjedhor për ankesa dhe parashtresa në fund të tij ka një këshill juridike sipas së cilës palët mund të anikomohen në Gjykatën Supreme, brenda afatit prej 48 orëve dhe ne si Komision Qendror i Zgjedhjeve duhet të presim që të zhvillohen të gjitha procedurat ligjore, pasi tani ka një ankesë të dorëzuar në këtë institucion. Sipas ligjit për zgjedhjet e përgjithshme në rastet e tilla kur ka një ankesë të kësaj natyre të paraqitur në Gjykatën Supreme, ky institucion ka një afat kohorë prej 5 ditësh për të marrë vendim lidhur me çështjen që është paraqitur aty”, ka deklaruar Elezi në emisionin “Ditari” në Tëvë1.

Elezi ka treguar se 27 subjekte politike janë të certifikuar nga KQZ, me gjithsej 1232 kandidatë për deputet.

“Gjatë procesit të aplikimit për të garuar në këtë proces zgjedhor nga data 1 shtator deri më 11 dhjetor 2024, Komisioni Qendror i Zgjedhjeve ka pranuar gjithsej aplikime nga ana e 28 subjekteve politike me gjithsej të 1280 kandidatë, në këto momente që flasim janë 27 subjekte politike të certifikuar nga ana e Komisionit Qendror të Zgjedhjeve me gjithsej 1232 kandidatë për deputet”, tha ai.

Madje, ai përmendi numrin e votuesve të regjistruar jashtë vendi që është 90 mijë e 860, ndërkaq sipas tij, pasi që është mbyllur platforma elektronike, kërkesa për t`u regjistruar si votues jashtë vendi ka qenë 18 mijë e 244.

“Për t`u regjistruar si votues jashtë Kosovës, numri i votuesve të regjistruar jashtë vendit është 90 mijë e 860 ndërkaq në momentin kur është mbyllur platforma elektronike kanë qenë 18 mijë e 244 kërkesa pra për t`u regjistruar”, shtoi Elezi./