Fatlind Neziri, djali i dy ish-luftëtarëve të Ushtrisë Çlirimtare të Kosovës, Nezirit dhe Mejremes, ka përfunduar me sukses Akademinë Ushtarake Turke në kuadër të Forcës së Sigurisë së Kosovës.

Përveç formimit ushtarak, ai ka diplomuar edhe në fushën e Marrëdhënieve Ndërkombëtare, në kuadër të Ministrisë Turke të Mbrojtjes, transmeton lajmi.net.

Lajmin e ka ndarë sot ish-kryeministri dhe lideri i AAK-së, Ramush Haradinaj, duke e përgëzuar nipin e tij për arritjen.

“Duke vazhduar traditën familjare të shërbimit ndaj atdheut, Fatlindi sot i shërben vendit me nder dhe përkushtim në uniformën e Ushtrisë së Kosovës”, ka shkruar Haradinaj, duke theksuar krenarinë që ndjen për të.

Fatlind Neziri tashmë është pjesë e strukturave të FSK-së, ku pritet të kontribuojë me përgatitjen e tij profesionale dhe përkushtimin për atdheun./lajmi.net/