Ajo këto deklarata i ka bërë në Kosovë, në një konferencë pas takimit që pati me presidenten Vjosa Osmani. Së këndejmi, ajo përkujtoi edhe misionin e KFOR-it në Kosovë, teksa u shpreh se shteti i saj janë krenarë që mund ta quajnë aleat shtetin kosovar.

“E di se shumë veta në Kosovë janë të shqetësuar për sigurinë e saj në këtë kohë shqetësuese. Dëshiroj që t’iu siguroj që përkushtimi i SHBA-së dhe i aleatëve tanë vazhdon të mbetet i fuqishëm. KFOR-i i cili është zbarkimi më i madh i NATO-s është një manifestim më i madh, i dukshëm, i përkushtimit të dukshëm për sigurinë e stabilitetin e Kosovës. SHBA janë krenare që Kosovën mund ta quajnë si partnere të tyre”, deklaroi ajo.

Komenti i saj vjen në vazhdën e serisë së deklarimeve nga krerët institucionalë për, siç e cilësojnë ata, rrezikun që mund t’i shkaktohet Kosovës nga Serbia. Madje, kryeministri i Kosovës, Albin Kurti, bashkë me presidenten Osmani shpeshherë e kanë quajtur Serbinë si “satelit të Rusisë”.

Donfried po ashtu kërkoi që Kosova të angazhohet për arritjen e një marrëveshjeje gjithëpërfshirëse me Serbinë, që në qendër kanë njohjen reciproke.

Presidentja e vendit, në konferencën e përbashkët me zëvendës-kreun e diplomacisë amerikane, e cila shprehu nevojën urgjente për dialogim me palën serbe, mirëpo tha se marrëdhëniet me SHBA-në dhe aleatët e Kosovës nuk mund t’i përcaktojë dialogu.

“Natyrisht se ne sot diskutuam për urgjencën dhe nevojën për progres në procesin e dialogut, gjithnjë të përqendruar në njohjen reciproke.Kosova është dhe vazhdon të jetë palë konstruktive në dialog dhe se mbesim të përkushtuar ndaj  këtij procesi, i cili në qendër ka njohjen reciproke dhe nga i cili përfitojnë përfundimisht qytetarët tanë”, tha ajo përgjatë konferencës.

Në Kosovë, sipas statistikave të fundit, KFOR-i ka prezent 3,746 trupa. /Lajmi.net/