Alice Weidel mund të mos jetë personi që do ta imagjinonit në krye të lëvizjes politike të ekstremit të djathtë të Gjermanisë.

Kështu shkruan mediumi prestigjioz Sky News, i cili bën të ditur se ajo është homoseksuale me një partnere nga Sri Lanka, regjisoren Sarah Bossard, përcjell Telegrafi.

Dhe Weidel, bashkë-drejtuese dhe kandidate për kancelare e një partie që është e fiksuar pas dashurisë së saj për Gjermaninë, nuk është as banore me kohë të plotë e vendit.

Në vend të kësaj, ajo e ndan kohën e saj mes Berlinit dhe Zvicrës, së bashku me partneren dhe dy djemtë e tyre.

Për më tepër, ajo është një gjermanoperëndimore në krye të AfD, parti e cila është dhe ka qenë gjithmonë shumë më e fortë në Gjermaninë Lindore.

Sipas Sky News, Weidel, një prind homoseksual, ka miratuar përkufizimin e një familjeje si nënë, baba dhe fëmijë.

Ajo thotë se legalizimi i martesës së homoseksualëve është i parëndësishëm.

Ajo ka pohuar se Gjermania është viktima e vërtetë e luftës në Ukrainë, për shkak të dëmeve ekonomike që ka dhe do të pësojë.

Lufta, tha ajo, “nuk është aspak çështja jonë” dhe pretendon se, kur të përfundojë, Ukraina duhet të mbajë përgjegjësi.

Zonja Weidel ka lindur në Gutersloh, një qytet me rreth 100,000 banorë afërsisht në gjysmë të rrugës midis Dortmundit dhe Hanoverit, ku tha se ishte fyer dhe abuzuar vazhdimisht nga emigrantët nga Lindja e Mesme.

Ajo studioi në lindje të Gjermanisë, në Bayreuth, më pas punoi për Goldman Sachs dhe Bankën e Kinës, duke kaluar gjashtë vjet duke jetuar në Kinë.

Ajo është një adhuruese e liberalizmit ekonomik – duke deklaruar Margaret Thatcher si modelin e saj dhe duke përkrahur, për shembull, taksat e ulëta dhe heqjen e taksës së trashëgimisë.

Vetëm kohët e fundit, me pahir, ajo ka pranuar se nuk është më praktike për Gjermaninë të ndalojë përdorimin e euros si monedhë të saj, por euroskepticizmi i saj mbetet i tillë.

Siç kujton Sky News, gjyshi i Weidel, Hans Weidel, ishte një gjykatës nazist, i emëruar nga Adolf Hitleri, një fakt për të cilin ajo pretendon të ketë qenë “në harresë” derisa studiuesit ia zbuluan atë.

Gjatë një bisede live me Elon Musk, pasi u pa miliona herë në internet, ajo pretendoi se nazistët “nuk ishin të djathtë” dhe tha se Hitleri ishte “një djalë komunist dhe socialist”.

Në fakt, thekson Sky News, Hitleri i urrente komunistët dhe socialistët; ata ishin disa nga njerëzit e parë të dërguar në kampet e përqendrimit.

Ajo ka vënë në pikëpyetje çështjen e vaksinave kundër Covid-19, dyshoi në provat e ngrohjes globale dhe i bëri jehonë teorisë së “zëvendësimit të madh” të kaq shumë teoricienëve të konspiracionit.

Për disa, ajo është një prani e rrezikshme, madje ogurzezë. Për të tjerët, ajo është një ndryshim freskues dhe rrënjësor.