Deputeti Tom Doshi kapet me 23 milion euro të pajustifikuara
Deputeti Tom Doshi do të dalë sërish para drejtësisë, kësaj here pas padisë së kryer nga ana e Inspektoratit të Lartë të Deklarimit dhe Kontrollit të Pasurive e cila ka zbuluar 23 milionë euro pasuri të pajustifikuara nga ana e tij.
Lajme
Nga shuma e mësipërme 14 milionë euro rezultonin të fshehura, ndërsa 9 milionë euro sipas ILDKPKI-së janë kryer me transfere të dyshimta e pa burime të ligjshme financiare.
Ndaj deputetit Doshi në Gjykatën e Lartë është duke u trajtuar edhe një çështje tjetër që ka lidhje me atentatin e pretenduar nga ai, ku akuzohet së bashku me deputetin tjetër Mark Frroku nga Prokuroria për kallëzim të rremë dhe dëshmi të rreme.
Lidhur me këtë akuzë, Doshi qëndroi për një muaj nën arrest shtëpie, ndërsa më 28 prill Gjykata e Lartë vendosi masën e sigurisë detyrim paraqitje, raportojnë mediat në Shqipëri.
Njoftimi i ILDKPKI-së për Kallëzimin penal ndaj deputetit Tom Doshi
Inspektorati i Lartë i Deklarimit dhe Kontrollit të Pasurive dhe Konfliktit të Interesave, bazuar në ligjin nr. 9049, datë 10.4.2003 “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publike”, i ndryshuar, përfundoi kontrollin dhe rikontrollin e plotë të deklaratave të interesave private të subjektit Tom Doshi, me funksion Deputet i Kuvendit të Shqiperisë, për periudhën kohore 2005 – 2014, nga ku rezultuan fshehje të pasurive, deklarime të rreme, për pasuritë në shumën rreth 14.000.000 euro, kontrata fiktive pasurish, transferta bankare të dyshimta e pa burime të ligjshme financiare dhe dyshime për pastrim parash, brenda dhe jashtë vendit, në shumën rreth 9.000.000 euro.
ILDKPKI bën me dije se subjekti Tom Doshi është kontrolluar nga 2005 deri 2013 disa herë, por, edhe pse në kontrollet e kaluara Inspektorët e çështjes kanë evidentuar shkelje të ligjeve dhe konflikte interesi dhe kanë propozuar zgjidhjet sipas ligjit, drejtuesit e ILDKPKI-së i kanë mbajtur ato të fshehura, duke mos i dërguar dosjet në organin e Prokurorisë, ashtu siç përcaktohet në ligjet bazë të ILDKPKI.
ILDKPKI ka dërguar kallëzimin penal në Prokurorinë e Përgjithshme për veprat penale të parashikuara nga nenet 257a//2 dhe 287 të Kodit Penal, duke insistuar që hetimet paraprake të shtrihen më tej, me qëllim për të zbuluar nëse ndodhemi edhe para veprave të tjera penale.
