Ministri i Jashtëm serb, Ivica Daciq ka thënë përmes një deklarate për media se Serbia “nuk do të lejojë shkatërrim apo sulm ushtarak” ndaj Republikës Srpska në Bosnjë.

Komentet e Daciq vijnë pak kohë pasi komandanti i ushtrisë së Bosnjës në kohën e luftës, Sefer Haliloviq ka thënë se pa ndihmën e Beogradit, forcat e Republikës Srpska nuk do të mund të qëndronin më shumë se 15 ditë ndaj forcave të Bosnjës.

Haliloviq, i cili është i pensionuar, nuk mban asnjë pozitë zyrtare.

Daciq ka thënë se deklarata e Haliloviq ishte “në lidhje me shkatërrimin e Republikës Srpska e që paraqet kërcënim serioz për paqen dhe stabilitetin në rajon”.

Tensionet janë ngritur në Bosnjë Hercegovinë, përpara referendumit të caktuar më 25 shtator ku do të vendoset nëse Republika Srpska do të festojë ditën e entitetit më 9 janar, ditën kur më 1992 deklaroi shkëputje nga Bosnja.

Gjykata Kushtetuese në Bosnjë ka thënë se kjo ditë feste është diskriminuese ndaj boshnjakëve dhe kroatëve të Bosnjës dhe ka thënë se referendumi është i jashtëligjshëm.