Gjykata Kushtetuese ka aprovuar kërkesën e Listës Serbe për masë të përkohshme, që ndalon çdo veprim të deputetëve të Kuvendit dhe çdo procedurë për formimin e Qeverisë deri më 30 shtator.

Kjo kërkesë u dorëzua nga kjo parti në të shtunën e kaluar lidhur me zgjedhjen e nënkryetarit nga komuniteti serb, transmeton lajmi.net.

Në vendimin e publikuar, Gjykata Kushtetuese përcakton:

“TË CAKTOJË ex officio dhe sipas kërkesës së parashtruesve masën e përkohshme përmes të cilës ndalohet çdo veprim i deputetëve të zgjedhur të Kuvendit … si dhe çdo procedurë për formimin e Qeverisë; TË URDHËROJË që masa e përkohshme hyn në fuqi më 5 shtator 2025, në kohëzgjatje deri më 30 shtator 2025.”

Gjykata thekson se kjo ndalim nuk paragjykon çfarëdo vendimi përfundimtar në çështjen bazë, por synon të shmangë:

• rreziqe dhe dëme të pariparueshme ndaj themelimit kushtetues të institucioneve;

• vendimmarrje në kundërshtim me Kushtetutën;

• cenimin e rendit kushtetues që mbart interes të fortë publik.

Ndërkohë, kryeparlamentari Dimal Basha, pavarësisht mungesës së nënkryetarit serb, ka përmbyllur seancën konstituive të Kuvendit duke e konsideruar atë të konstituuar./lajmi.net/