Eugen Cakolli nga Demokracia në Veprim ka deklaruar se bazuar në trendin aktual të votave me postë, Lëvizja Vetëvendosje është afër sigurimit të 49 ulëseve në Kuvendin e Kosovës.

Ai ka thënë se bazuar në mbi 30 për qind të votave me postë të numëruara, përfshirë ato nga vendvotimet e rregullta dhe misionet diplomatike, Lidhja Demokratike e Kosovës po shënon ndryshime pozitive.

“Ajo çfarë bie në sy është një performancë tejet pozitive e LDK-së, e një e dobët e PDK-së. LVV-ja vazhdon të jetë e para me shumicën e votave me postë, por është dukshëm larg nivelit të përkrahjes sikur në votat në misionet diplomatike”, ka shkruar ai në Facebook.

Sipas tij, LVV-ja është afër sigurimit të 49 mandateve, por që ta arrijë këtë, duhet të fitojë mbi 60% të të gjitha votave me postë.

Ai ka shtuar se kjo parti mund të arrijë edhe në 50 mandate në rast se fiton mbi 70 për qind të votave me postë.

“Me një trend të tillë, LDK-ja është vetëm disa qindra vota larg që ta marrë edhe një mandat nga PDK-ja, dhe nëse vazhdon të performojë mirë në votat me postë, mund të arrijë 21 mandate. Nëse LDK-ja rritet edhe më shumë, kjo mund të ndikojë në gjasat e LVV-së për të siguruar 49 mandate. PDK-ja është në zonë kritike midis 23, 24 dhe 25 mandateve. Aktualisht është në 24 mandate, por afër ta humbë një. E madje, nëse LVV-ja shkon drejt 50 mandateve, PDK-ja mund të humbasë edhe një mandat tjetër. Për t’i pasur 25 mandate, PDK-ja duhet t’i ketë mbi 13% të votave me postë – që është gati dyfishi i përqindjes që ka tash”, ka shtuar ai.