“BBC” e cilëson vizitën e shefit të qeverisë shqiptare si “historike”, ndërsa rivendosjen e urave të bashkëpunimit me Beogradin, si një nga sfidat më të mëdha të Shqipërisë në politikën e jashtme. “Vizita e Kryeministrit Rama në Beograd, një mundësi historike për të përmirësuar marrëdhëniet mes dy vendeve, por që nuk i shpëtuan dot tensioneve sa i përket çështjes së Kosovës. Në frontin e politikës së jashtme, një prej sfidave më të mëdha me të cilat ai përballet është rivendosja e urave të bashkëpunimit me Beogradin”, thuhet në vëzhgimin e “BBC”-së. 

Sipas analizës, Shqipëria ka shenja të progresit ekonomik, ku sfidë mbetet mbajtja nën kontroll e inflacionit. “Shqipëria është shndërruar në një ekonomi tregu. Bujqësia është një sektor i rëndësishëm dhe një vend punësimi i madh. Miëpo, vendi është larg nga standardet e Evropës Perëndimore, ku në 2013-n borxhi publik arriti në 60 për qind të PPB-së”, thuhet më tej. 

Analiza ndalet edhe tek zgjedhjet, ku theksohet se Partia Socialiste mori një fitore dërrmuese në zgjedhjet parlamentare të 2013-ës, duke i dhënë fund 8 viteve të qeverisjes demokrate. Ndërsa Kryeministri Rama cilësohet si një folës i mirë i gjuhës angleze, frënge dhe italiane, si një njeri dinamik, me një personalitet të fortë. 

Analiza ndalet edhe tek aspirata e Shqipërisë për t’u bërë pjesë e Bashkimit Evropian. “Shqipëria aplikoi për statusin e vendit kandidat në BE në vitin 2009 dhe e mori statusin në qershor të vitit 2014”, thuhet në analizë. Në këtë kontekst, “BBC” nënvizon reformat e kërkuara nga BE-së të cilat kanë në qendër luftën kundër krimit të organizuar dhe korrupsionit, i cili “mbetet një nga problemet më të mëdha që ka Shqipëria”.