Deputetja e LDK-së, Hykmete Bajrami përmes një postimi në Facebook ka shkruar në lidhje me “serinë” e seancave të konstituimit të Kuvendit, të cilat nuk po sjellin rezultat.

Ajo ka thënë se Lëvizja Vetëvendosje, e ka reduktuar paaftësinë për konstituimin e Kuvendit në një problem teknik: “mbledhja e deputetëve çdo 48 orë”

Bajrami ka thënë se për LVV-në, moskonstituimi i Kuvendit nuk është problem, por problemi është që deputetëve po ju duhet të shkojnë në Kuvend çdo 48 orë, shkruan lajmi.net.

“Pra, për ata nuk është problem fakti që vendi është pa Kuvend funksional, pa Qeveri legjitime, pa institucione që u përgjigjen sfidave të qytetarëve, me projekte të bllokuara dhe qindra miliona euro donacione të humbura, problemi për LVV-në është orari i seancave”, ka shkruar Bajrami.

Ajo ka thënë se në situatën në të cilën gjendet Kosova, seanca konstituive nuk do të duhej të ndërprehej më gjatë se 10 minuta deri në konstituim.