Deputetja e LDK-së, Hykmete Bajrami ka shkruar në lidhje me praninë e kryeministrit Albin Kurti në ditën kur po nënshkruheshin kontratat dhe po shpërndaheshin kartelat për 220 punëtorët e pranuar në Korporatën Energjetike të Kosovës.

Sipas saj me këtë rast, Kurti ka ushtruar detyrën e drejtorit të KEK-ut dhe atë të drejtorit të burimeve njerëzore e që sipas saj është keqpërdorim i ndërmarrjeve publike për blerje votash.

“Para dy ditësh në KEK, Kurti shpërndau 220 kontrata punësimi, duke e shndërruar një ndërmarrje publike në instrument të fushatës së tij zgjedhore. Këto punësime, të maskuara si “në funksion të mihjes dhe prodhimit të qymyrit” siç e tha ai vetë, janë asgjë më shumë se një përpjekje e pastër për të fituar mbështetje elektorale me metoda të paligjshme – komplet të paligjshme”, ka shkruar Bajrami.

Ajo ka shkruar edhe për paralajmërimin e SHSKUK-së për hapjen e një konkursi për 370 pozita që kanë qenë të mbajtura nga ushtrues detyre për më shumë se 10 vite, shkruan lajmi.net.

Bajrami ka pyetur se pse kjo po ndodh pikërisht në kohë të zgjedhjeve.