Deputeti i Lëvizjes Vetëvendosje, Mefail Bajqinovci dje në një deklaratë të tij ka nënkuptuar se nuk i njeh profesionet të cilat i kanë ushtruar kolegët e tij por edhe disa nga bashkëpartiakët para se të bëhen deputet.

Ai në një debat me zë të lartë me analistin Halil Matoshi në Kanal10 ka konsideruar se është gazetari i vetëm i cili u bë deputet.

“Unë s’jam hy pahiri në politikë, jo s’është qashtu Halil…Halil, unë jam bë deputet dy herë, ju s’keni mujtë me u bë deputet…Ti ke tentu me plot gazetarë me hy, edhe s’ke mujtë me hy kurrë, kurrë s’ke mujtë me u bo deputet. Kërkush hiç prej gazetarëve nuk u bë, hiç, kërkush s’ka mujtë, përveç meje” – ka thënë Bajqinovci.

Këtë që e ka thënë Bajqinovci nuk e dëshmon historia e Kuvendit të Kosovës që nga themelimi i tij si institucion.

Milaim Zeka, Berat Buzhala, Muharrem Nitaj, Veton Surroi, Tinka Kurti, Blerim Shala, Blerta Deliu e Doruntina Maloku, Dimal Basha janë disa nga emrat e mediave kosovare që janë bërë deputet.