Në raporton  zyrtar të datës 19.12.2014 të përpiluar nga Inspektorati i Punës, thuhet se në periudhën e përfshirë në Inspektim (1 janar – 30 nëntor 2014) 64 punonjës kanë marrë kompensim të pagës për mungesë nga puna, për shkak të lëndimit në vendim e punës. Pra, lëndimin e tyre në vendin e punës e vërteton kompensimi për lëndim.

Në ndërmarrjen e menaxhuar nga Ahmet Tmava, Inspektorati i Punës ka gjetur parregullsi lidhur me ndihmën e parë që duhet të ju ofrohet punëtorëve në rast të lëndimeve.

“Në njësitë punonjëse: Objektet Administrative të Minierës me Flotacion në Stan Tërg, Menaxhment, Fabrika e Pajimeve të Procesit, Industria e Baterive, Industria Kimike, Mbrojtja dhe Siguria në Punë, Metalugjia e Zinkut, Departamenti i Zhvillimit dhe Mbrojtjes së Mjedisit, FMFJ Skenderaj, QMP dhe Trafostacioni, nuk i kanë pajisur me kuti sanitare, gjegjësisht nuk ka ndërmarrë masat e nevojshme për ndihmën e parë, e obligueshme me Ligjin për Sigurinë dhe Shëndetin në Punë”, thuhet në faqe 30 të raportit të Inspektoratit të Punës.

Në lidhje me shëndetin e punëtorëve të Trepçës, Inspektorati i Punës ka evidentuar si shkelje edhe mos dërgimin e punëtorëve në kontrolle mjekësore çdo gjashtë muaj, përkatësisht çdo tri vite, ashtu siç është e obligueshme me Ligjin Ligjin për Sigurinë dhe Shëndetin në Punë.

Në fund të këtij raporti të përpiluar më 19.12.2014, thuhet se punëdhënësi sipas Ligjit të Punës dhe Ligjit për Inspektoratin e Punës është i obliguar që brenda afatit prej 15 ditësh të informoj Inspektoratin e Punës me shkrim dhe të dëshmoj me prova eliminimin e këtyre parregullsive.

Mirëpo, edhe përkundër kësaj menaxhmenti i Trepçës me në krye Ahmet Tmavën, nuk është shqetësuar dhe ka shpërfillur rekomandimet dhe vendimet e Inspektoratit të Punës, pasi që nuk ka marrë veprime për t’i eliminuar këto parregullsi. Këtë e vërteton raportin i Inspektoratit të Punës i datës 22 prill 2015, ku në faqe 4  në katër pika thuhet se nuk janë ofruar dëshmi për eliminimin e parregulsive. (veriu.info).