Sekretari amerikan i Shtetit, John Kerry, ka thënë se iu është mirënjohës të gjithë atyre që kanë kontribuuar në lirimin e gazetarit Curtis, por nuk ka përmendur emra dhe as detaje se si ka ardhur deri tek lirimi i këtij gazetari, një javë pasi një tjetër gazetari amerikan iu hoq koka nga militantët e ISIS.

Gazetari i liruar Curtis, i kidnapuar në Turqi, afër kufirit me Sirinë në vitin 2012, mbahej nga grupi i lidhur me Al Kaidën, al Nusra, të cilët po luftojnë kundër regjimit të presidentit sirian, Bashar al Assad.

Sekretari amerikan ka thënë se Ëashingtoni po përdor të gjitha mundësitë diplomatike, ato të inteligjencës dhe aftësitë ushtarake, që i ka në disposzicion për të siguruar të gjithë qytetarët amerikanë që po mbahen në Siri nga grupet militante që po luftojnë kundër Assadit.

Curtis, një banor i Massachusetts, është gazetar, autor  librash, i cili flet rrjedhshëm në arabisht dhe frëngjisht.

“Zemra ime është e plotë, është lajm i jashtëzakonshëm dhe u jam përjetësisht mirënjohës të gjithë atyre që më qëndruan pranë gjatë këtyre muajve dhe ndihmuan në lirimin e tij”, tha nëna e Curtis, Nancy Curtis.

Curtis, duke punuar si gazetar në Jemen, u bë i njohur në këtë rajon pasi u interesuar në tregimet e të rinjve të pakënaqur në Perëndim, të cilët shkonin në Lindje për të studiuar Islamin, dhe për këtë, ai shkroi edhe librin e tij, “Undercover Muslim”, i cili u botua në Mbretërinë e Bashkuar.

Administrata e presidentit Barack Obama ka njoftuar se gazetari Curtis tani është i sigurt, është nxjerrë nga Siria, por nuk dha detaje në lidhje me rrethanat e rrëmbimit dhe as të lirimit të tij.

Mediat amerikane shkruajnë se në lirimin e gazetarit 45 vjecar ishin të përfshirë Qeveria e Katarit, e madje edhe Kombet e Bashkuara, por Qeveria amerikane nuk ka dhënë detaje përvec lajmit për lirimin e tij.

Lajmi për lirimin e gazetarit Curtis u mirëprit kudo, pasi ditë më parë, bota u tmerrua nga videoja e publikuar nga organizata terroriste “Shteti Islamik i Irakut dhe Sirisë” (ISIS), ku shihej një militant i ISIS-it duke ia prerë kokën një gazetari tjetër amerikan të “Global Post”, James Foley, i cili ishte zënë rob në vitin 2012 në Siri.

Rrëmbyesit e Foley për lirimin e tij kishin kërkuar 132 milionë dollarë amerikanë nga prindërit e gazetarit, si dhe koncesione politike nga qeveria amerikane në raport me Lindjen.

Në këtë video shihej edhe një tjetër rob, i identifikuar si gazetari amerikan, Steven Sotloff, me paralajmërimin se fati i tij varet nga lëvizjet e ardhshëm të presidentit amerikan, Barack Obama, por i cili përkundër kërcënimeve të militantëve, vazhdoi sulmet mbi caqet e “Shtetit Islamik” në Irakun verior.

“Pavarësisht se na erdhi lajmi i mirë për lirimin e gazetarit Curtis, ngjarja e javës së kaluar, prerja e kokës së gazetarit Foley, tronditi ndërgjegjen e botës. Dhe siç ka thënë edhe  presidenti Barack Obama, ne do të vazhdojmë të përdorim të gjitha mjetet në dispozicion për të liruar të gjitha pengjet amerikane në Siri, Irak dhe kudo tjetër|, tha këshilltarja për Siguri Kombëtare, Susan E. Rice. /lajmi.net/