Kryetari i LDK-së, i cili ishte edhe kandidat për kryeministër nga kjo parti, Lumir Abdixhiku ka reaguar pas publikimit të rezultatit zgjedhor nga KQZ.

Ai i ka falenderuasit votuesit e tyre, ndërsa qytetarëve të Kosovës i ka shprehur mirënjohje për vlerësimin e dhënë dhe për mundësinë e dytë ndaj tyre, shkruan lajmi.net

“Nga dhjetori deri më sot nuk ka kaluar shumë kohë. Në çdo normalitet kohor, gjërat nuk do të ndryshonin kaq shpejt. As gjashtë muaj diferencë mes dy palë zgjedhjeve. Por për LDK-në, dhe vetëm LDK-në e askënd tjetër, ishte ndryshe. Këtë herë për të mbarë. Nga një krizë historike me apetite e projekcione të errëta, drejt një stabiliteti të ri. Drejt rikthimit të besimit duke qenë të vërtetë dhe duke qenë vetja. Dhe kjo është pasuria më e madhe që kemi sot. Qëndrojmë si LDK me 20 mandate”, ka thënë Abdixhiku.

Ai i ka falenderuar edhe veprimtarët e tyre për çka ka thënë se janë të palodhur.

“Ju jeni arsyeja e këtij rikthimi, prandaj kokën lart. Ju zotohem se nuk do të lejojmë që mundi juaj të shpërdorohet më nga asnjë protagonizëm individual. LDK-ja juaj është në rrugën e drejtë. Bashkimi sapo ka nisur; dhe siç ju kemi thënë ky bashkim nuk do të ndalet. Do të vazhdojmë angazhimin tonë gjithandej Kosovës. Që nga sot madje. Ka ende shumë njerëz që presin ftesën tonë, shumë energji të mira e të reja që duan të bëhen pjesë e këtij rrugëtimi”, ka shkruar Abdixhiku.

Ai ka thënë se para tyre kanë reforma të thella të brendshme.

“Na duhen njerëz që i japin vizionit tonë, që ndërtojnë bashkë me ne, e jo të tillë që vetëm marrin pa dhënë, pengojnë e shpresojnë në rrënim kolektiv për përfitim individual. Këto reforma do t’i bëjmë. Me prioritet, shpejtë dhe qartë si kurrë më parë. Por përtej vetes sonë, tani është koha t’i japim vendit drejtim. Kosova jonë vazhdon të jetë në krizë. Kosova jonë ka nevojë për stabilitet. LDK për të dytën herë arriti të krijojë parakushte për balancë demokratike para kontrollit absolut. Nuk ishte e lehtë. Pa punën tonë Kosova do të dukej e frikshme. Tani na duhet maturi, vizion, dhe apetit për zhvillim të vendit. Prandaj, një rrugë e gjatë na pret përpara. Dhe këtë rrugë do ta ecim bashkë”, ka shtuar i pari i LDK-së.

Ai i ka uruar të gjitha partitë politike për një garë që ka thënë se ishte demokratike dhe për rezultatin e tyre zgjedhor.

“Le ta shfrytëzojmë këtë rezultat për ta bërë vendin siç e meriton. Falënderoj poashtu të gjithe ata që na uruan, inkurajuan e ofruan veten per drejtimin përpara. Ishit të shumtë, ishin me zemër, ishin me plot dashni – sepse kjo shtëpi vërtetë ështe e juaja; dhe shtepia duhet nuk lakmohet”, ka thënë ai.

LDK në zgjedhjet e djeshme, me numrimin e votave nëpër qendra të votimit në Kosovë ka marrë 17.58% të votave duke dal e treta me radhë. Kujtojmë se ende nuk janë numëruar votat me kusht, ato të personave me nevoja të veçanta dhe votat e mërgatës. /Lajmi.net/

Postimi i plotë: