Presidenti i Interit, Massimo Moratti ka insistuar se klubi nuk do të transferojë yje si Gareth Bale, pas ardhjes së pronarit të ri, Erick Thohir.

Klubi nga Giuseppe Meazza ka një pronar të ri pasi Thohir bleu 70 përqind të aksioneve nga Moratti. Kjo ka zgjuar spekulime të menjëhershme se indoneziani mund të sjellë yje të mëdhenj në Inter.

Por, Moratti ka theksuar se nuk pret ardhjen e futbollistëve me status të super yjeve në të ardhmen e afërt. “Ato lloj përforcime që i gëzojnë tifozët, janë për shembull Gareth Bale, por tifozët e Interit nuk duhet të presin blerje të tilla”, deklaroi Moratti për të përditshmen sportive italiane Gazzetta dello Sport.

“E kam përshtypjen se Thohir ka plane tjera me Interin. Pa dyshim, gara me ekipet rivale mund të ndikojë në politikën e klubit”, përfundoi Moratti i cili gjatë epokës së tij në krye të Nerazzurrëve transferoi yje si Ronaldo, Wesley Sneijder, Zlatan Ibrahimovic e Samuel Eto’o.