Trajneri i Barcelonës, Gerardo Martino ka theksuar se skuadra e tij bëri mjaft për të fituar ndeshjen, por humbi 1:0 në udhëtim te Granada duke i dhënë avantazh në garë për titull Atletico Madridit dhe Real Madridit.

Gjiganti katalan kishte 86 përqind të posedimit të topit dhe humbi një numër të madh rastesh për shënim, derisa goli në pjesën e parë nga Yacine Brahimi ishte ai që e përcaktoi fituesin.

“La Liga e humbur? Është jashtë duarve tona tani, sigurisht. Por, do të vazhdojmë të luftojmë. Nuk mund t’i fajësojë futbollistët, ata vazhduan lojën e tyre, ne kishim raste por nuk arritëm t’i finalizojmë ato”, deklaroi Martino.

“Ne do të vazhdojmë të luftojmë deri në fund dhe sigurisht edhe në finalen e Copa del Rey të mërkurën. Të mërkurën nuk guxojmë të gabojmë, ne duhet t’i japim gëzim tifozëve. Nuk zhvilluam lojë të keqe sonte, merituam fitore por topi nuk deshi të hynte brenda”, u shpreh ai.