Gjykata Themelore në Gjilan, dega në Viti, ka caktuar një muaj paraburgim ndaj personit të dyshuar për sulmin fizik ndaj gjyqtares Qëndresa Sejdiu, ngjarje kjo që ndodhi më 4 nëntor në fshatin Sadovinë e Jerlive të Vitisë.

Vendimi është marrë pas kërkesës së Prokurorisë Themelore në Gjilan, e cila të dyshuarin me inicialet H.Y. e ngarkon me veprën penale “Sulmi ndaj personit zyrtar”, transmeton lajmi.net.

Sipas njoftimit të gjykatës, ngjarja ka ndodhur rreth orës 14:00, derisa gjyqtarja Sejdiu ishte duke realizuar një ekzaminim të terrenit në kuadër të një lënde civile.

Gjatë këtij veprimi procedural, i dyshuari, i cili ndodhej në vendin e ngjarjes, dyshohet se ka ndërhyrë në mënyrë agresive në punën zyrtare të gjykatës, duke ndërmarrë veprime të drejtpërdrejta ndaj gjyqtares dhe duke cenuar integritetin e saj fizik.

Gjykata ka vlerësuar se ekzistojnë arsyet ligjore për caktimin e masës së paraburgimit, duke konstatuar se masat e tjera alternative nuk do të ishin të mjaftueshme për zhvillimin e suksesshëm të procedurës penale.

Njoftimi i plotë: 

Një muaj paraburgim të dyshuarit për sulm ndaj personit zyrtar

Viti, 6 nëntor 2026 – Gjykata Themelore në Gjilan – Dega Viti ka aprovuar kërkesën e Prokurorisë Themelore të Gjilanit, duke i caktuar masën e paraburgimit prej 1 (një) muaji të pandehurit H. Y. i cili dyshohet për kryerjen e veprës penale sulmi ndaj personit zyrtar.

Sipas kërkesës së prokurorisë me datë 04.11.2026 rreth orës 14:00 në fshatin Sadovinë e Jerlive të Komunës së Vitisë, gjatë realizmit të ekzaminimit të terrenit në kuadër të lëndës civile, pranë Gjykatës Themelore në Gjilan – Dega Viti, veprim procedural që ndërmerrej nga gjyqtarja e rastit, me qëllim të shqyrtimit dhe konstatimit të rrethanave faktike relevante për çështjen civile, i pandehuri H. Y. i pranishëm në vendin e ngjarjes, me dashje, vetëdije dhe në mënyrë agresive, ndërhyn në zhvillimin e veprimit zyrtar të gjykatës, duke ndërmarr veprime të drejtpërdrejta kundër gjyqtares dhe duke cenuar integritetin e saj fizik, si dhe autoritetin dhe ushtrimin e pavarur të funksionit gjyqësor.

Më këto veprime i pandehuri H. Y. dyshohet të ketë kryer veprën penale sulmi ndaj personit zyrtar, vepër e sanksionuar me Kodin Penal të Republikës së Kosovës (KPRK).

Gjyqtari i procedurës paraprake ka vlerësuar se qëndrojnë arsyet ligjore për caktimin e paraburgimit ndaj të pandehurit, duke i marrë për bazë të gjitha ato që u thanë më lart, masat tjera alternative do të ishin të pamjaftueshme për zhvillimin me sukses të procedurës penale.

Palët kanë të drejtën e ankesës ndaj këtij vendimi në Gjykatën e Apelit të Kosovës./lajmi.net/