Kryetari i Komisionit Hetimor për rastin e Arlinda Zekajt, Burim Ramadani ka shkruar pasi sot është mbajtur mbledhja e parë.

Ai ka thënë se ky komision do të punojë mbi bazën e fakteve, dokumenteve, dëshmive dhe përgjegjësive konkrete.

“Rasti i Arlinda Zekajt është një alarm serioz për të gjithë sistemin institucional. Komisioni nuk është farsë. Komisioni nuk do të bëjë raport politik. Por, vetëm në fakte. Do t’i shqyrtojmë të gjitha hallkat institucionale. Asnjë institucion dhe asnjë individ nuk mund t’i shmanget përgjegjësisë ligjore”, ka shkruar Ramadani.

Ai ka kërkuar nga të gjitha institucionet që të jenë bashkëpunuese dhe që të nisin përgatitjen e dokumenteve që do të kërkohen.

“Neni 19 dhe Neni 20 i Ligjit për Hetim Parlamentar përcaktojnë qartësisht se të gjithë të intervistuarit si dëshmitar janë të detyruar të bashkëpunojnë me Komisionin. Pra, nuk është dëshirë apo zgjedhje, por është obligim ligjor. Në të kundërtën, vlejnë dispozitat e Kodit të Procedurës Penale kundër dëshmitarit që nuk bashkëpunon me Komision. Shpresoj se asnjë nga ta nuk do të refuzojë apo tentojë të fsheh nga Komisioni”, ka shkruar ramadani.

Ai ka thënë se qëllimi i tyre është të zbardhin të vërtetën institucionale, të identifikojnë përgjegjësitë dhe të propozojnë ndryshime që mund të shpëtojnë jetë.

“Komisioni, sikurse e dini, ka tri faza të punës së vet. Neni 14 i Ligjit për Hetim Parlamentar e përcakton shprehimisht se puna e komisionit ndahet në tri faza:

1. Faza e hetimeve (pra mbledhja e provave)
2. Vlerësimi i hetimeve (pra analizimi i provave)
3. Përgatitja e raportit final”, ka shkruar Ramadani. /Lajmi.net/

Postimi i plotë: