Deputetja e Partisë Demokratike të Kosovës (PDK), Blerta Deliu, ka kërkuar llogaridhënie urgjente nga Këshilli Prokurorial i Kosovës (KPK) lidhur me rastin e Arlinda Zekajt, duke ngritur pikëpyetje për veprimet e institucioneve dhe vonesat në raportimin para Komisionit për Legjislacion.

Përmes një postimi në Facebook, Deliu ka vënë në pikëpyetje arsyetimet e institucioneve lidhur me rastin, duke pyetur se kujt tjetër duhej t’i drejtohej Arlinda për të kërkuar ndihmë, pasi ajo kishte kërkuar mbrojtje nga shteti.

Sipas deputetes së PDK-së, kërkesat e Arlindës i ishin drejtuar edhe Këshillit Prokurorial të Kosovës, prandaj ajo ka kërkuar që ky institucion të japë përgjigje për mënyrën se si është trajtuar rasti.

Deliu ka bërë të ditur se të hënën ishte arritur dakordimi që KPK-ja të ftohej të martën në Komisionin për Legjislacion, por sipas saj, ftesa dhe mbledhja nuk janë realizuar.

“Pse po vonohet llogaridhënia?”, ka pyetur ajo, duke kërkuar që Këshilli Prokurorial të raportojë urgjentisht dhe të paraqesë dokumente e përgjigje për çdo veprim dhe mosveprim në këtë rast.

“Këshilli Prokurorial duhet të raportojë urgjentisht, me dokumente dhe përgjigje për çdo veprim e mosveprim. Arlinda kërkoi mbrojtje nga shteti. Familja e saj meriton ta dijë çfarë bëri shteti për të”, ka deklaruar Deliu.

Rasti i Arlinda Zekajt ka ngritur pikëpyetje për përgjegjësinë institucionale dhe mënyrën se si janë trajtuar kërkesat e saj për mbrojtje. Kërkesa e Deliut synon që KPK-ja të japë sqarime për veprimet e ndërmarra dhe çdo mosveprim të mundshëm nga institucionet përgjegjëse. /Lajmi.net/