Policia e Kosovës përmes një njoftimi për media ka konfirmuar se Arlinda Zekaj e cila u vra mbrëmë në Vitromiricë të Pejës ishte intervistuar për dhunë në familje, përpara se të gjendej e vdekur.

Sipas policisë, më 25 tetor rreth orës 19:00 autoritetet u njoftuan për një rast të dhunës në familje.

Gruaja u shoqërua në stacion policor për intervistim dhe bashkëshorti i saj u arrestua dhe u ndalua për 48 orë.

Madje sipas policisë, gruaja me vullnetin e saj është dërguar në shtëpi.

“Viktima, me vullnetin e saj, është dërguar në shtëpinë e saj në fshatin Vitomiricë”, thuhet në njoftimin e Policisë.

Por rreth orës 21:10, autoritetet morën njoftimin se ajo ishte gjetur pa shenja jete.

Ekipi mjekësor konstatoi vdekjen.

Policia thotë se ajo vdiq nga goditjet me një mjet të fortë.

Si i dyshuar për vrasjen përmendet kunati i saj.

Sipas Policisë, personi i dyshuar ishte në arrati, ndërsa Prokuroria dhe njësitë hetimore dolën në vendngjarje për të sqaruar rrethanat./Lajmi.net/